笑到最後 - 高明 2018年6月25日
笑到最後：寄望小米救港股
■小米上市若能做靚個勢，至少上市初期托得住，可以為下隻同股不同權鋪路。資料圖片
種種跡象顯示，港股就算唔係股災，亦很大機會步入熊市。
港股多個月應破頂而未破，眼見美國科技股越升越有，「港股美斯」騰訊（700）變成散步股王，越炒越頹。當美斯失準，整個港股都唔會好樣。
客觀上負面因素甚多，世界盃影響投資意慾、貿易戰、新興市場危機、中國信貸收縮、美國持續加息，種種因素都難令人覺得後市向好。
但當連高明呢啲寫稿佬都覺得，市場一大堆利淡因素，唔put都咪買股票，熊市嚟喇，短線彈一彈亦係時候。小米（1810）上市更係支持大市反彈主因。
小米招股書指出「小米不是單純的硬件公司，而是創新驅動的互聯網公司」，而德國寶網站則指「一直堅持以合理價錢，提供高品質、安全及創新的產品」。可見兩者的理念相近，小米係「手機界德國寶」，絕對當之無愧。
既然自稱「創新科技」可集資幾百億，加上又係修例後首隻同股不同權嘅示範單位，有需要托高個市製造氣氛。
大家都知道小米估值過高，亦知新股上市同估值無關，只係睇供求同氣氛，做靚個勢，至少上市初期托得住，為下隻同股不同權鋪路。否則小米上市見光死嘅話，連監管機構都會有壓力。如此原因造就港股短線一挾機遇，最簡單方法就係買恒指牛。
經過一月高位狂加、即買即打嘅慘痛教訓，高明今次醒目、學精咗，博係有條件地博，若恒指跌穿250天平均線，即平一半，若穿埋29129點2月低位，全數平倉兼轉軚睇淡！
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com