智取大市：避險都有機會時
■近期百幾至二百幾億市值嘅增長股當炒，股民可留意。資料圖片
如果同美股、A股指數比較，近期恒指走勢強度介乎兩者之間，而以大價股為主嘅道指，明顯弱過標普500。性質較國際化、轉身較慢嘅道指成份股，由於一向海外收入比重高，達到接近一半，於是喺貿易戰之下，比二三線
股宏觀形勢為差。二三線股面向市場、行業都較單一集中，投資者可透過選股去避開貿易戰，形成近期資金換馬現象。
特朗普一輪玩Show hand只會令貿易戰線拉長，相信避大股、買細股趨勢仲會持續。恒指近期跌破支持位，純粹因為大企業形勢弱，整體短線市況似乎未太悲觀。中港股只企穩一日半日，物管股又炒上，已是一例。百幾至二百幾億市值嘅增長股當炒，相信稍後資金偏向平均落注喺呢啲板塊。
除貿易戰外，A股股份質押情況受關注，大家驚斬倉引發類似3年前A股股災。同美股港股唔同，近日A股跌市以流通量偏低、低市值中小股主導，股王茅台仲喺高位附近，談不上受影響。
香港上市二三線股估值低、抵押唔嚴重，近日跌勢冇跟足A股中小股，未必會成為北水首選拋售對象。A股裏面，內房萬科、綠地等等近期喺低位回穩，香港內房當中不妨留意大灣區土儲比例相當高嘅時代中國（1233）。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com