經濟客艙：點解抽小米
■小米創辦人兼行政總裁雷軍。 資料圖片
年輕人，究竟有乜原因驅使你去抽新股？喺因為值搏率高，定係想考考眼光？係因為方便又賺得快呀！香港嘅散戶抽新股，相對其他股市嘅散戶機會多，開戶手續簡單，時間同等一個杯麵時間差唔多。
我哋抽新股，基本上只要有
個股票戶口，就可認購。至於係咪分到想要嘅認購手數，講彩數居多。美股市場發展相當成熟，機構投資者佔大多數，獨立投資者屬少數。美國嘅散戶想認購新股，門檻相對香港高，唔同券商又有不同要求。美國嘅散戶並非有股票戶口，就可以抽新股。舉行美國有券商，要求股票賬戶存放最少2.5萬美金，折合約19萬港紙，先可以認購新股。
另外，喺香港抽新股，無論「股齡」有幾多，甚至對炒股一竅不通，照樣可以參與，最重要銀彈充足。相反，美國嘅券商係可以唔接受新賬戶認購，有機會要求散戶過去三個月內，累積交易最少30宗，先可以落場。所以，喺香港抽新股，屬商券搵錢黃金機會，推出各類優惠吸客，新客戶開戶著數更加多。我哋相對美股抽新股嘅玩法，對散戶幾乎無乜要求。
呢個星期，相信大家聚焦於本港首隻以「同股不同權」形式上市嘅小米（1810），招股價介乎17蚊至22蚊，每手入場費4,444蚊。若以小米每手入場費與小米嘅產品定價比較，呢四千幾蚊足夠買好多野，譬如喺小米商城列出嘅產品，大部份定價均少於四千幾蚊港紙，可買到一部值約2,699人仔嘅小米8手機外，亦夠買一部小米無人機4k版，埋單盛惠2,999人仔。
不過，大家決定抽同唔抽，小米創辦人兼行政總裁雷軍成為今次上市最幸運的一個人。董事會一致同意雷軍獲發無附帶任何條件嘅15億美金股份獎勵，作為感謝雷軍對公司貢獻。好多美資公司或科技巨企也有派發股份獎勵先例，近年中資概念股也跟此風。例如京東4年前赴美上市，也向行政總裁劉強東派發巨額限制性發股份獎勵。不過，有說劉強東喺掛牌前婉拒咗9億美元嘅獎勵。
Captain Cool
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com