金手指：侵侵要輸票至收手
■美國係個選票推動嘅政治體，即係制裁舉動，要玩到輸票時先會停。 資料圖片/互聯網圖片
制裁，原本只得「狂人」特朗普會玩嘅玩意，點知特朗普支持率越企越硬，𠵱家就連國會都玩埋一份。
齋睇土耳其，牌面話佢扣押一個美帝傳教士，就落實制裁，搞到佢哋嘅貨幣滙率跌到一個七
皮（一年前對美元三算跌到落七算）。對俄羅斯就一波未平，一波又起。對大陸就見人民幣跌，關稅係咁加碼。
講真，土耳其放咗個傳教士，制裁會完咩？人民幣止跌，大陸同美帝就會和好如初？唔好玩啦，我、你、他都知仲會繼續。
上周孫柏文不斷諗，究竟個結局要係點先完？即究竟邊刻先係瞓身買call輪之時。要睇到咩跡象先知「貿戰打完啦」。大家要記得，美帝係個選票推動嘅政治體，即係呢啲制裁舉動，要輸票時先會停。
周末，見朋友王弼喺fb分享咗個數分鐘美帝電視劇Yellowstone嘅片段。裏面講個大牧場東主，揸車遊走自己塊地時，見到成架旅遊巴嘅強國遊客，落車踩入佢啲地上，近距離睇野生黑熊。個鬼佬東主，見熊即揸槍落車，因危險叫啲大陸遊客走。點知啲陸客話「我哋唔會走近」。東主再話塊地係佢嘅，快啲過主。點知啲陸客話唔信塊地係佢，又話就算係佢都應該share。最後，東主向天開槍，啲陸客先急急腳走。
即係美帝人民，普遍都覺你大陸人係蠻不講理，只會向強權屈服。選民有咁嘅感覺，美帝貿戰你覺得要點打先完？好肯定，連特朗普都唔知。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com