大棋局：貿易戰後下波攻勢
■特朗普挑起貿易戰只係其中一個手段，目的係迫中國開放市場，撬開缺口。 資料圖片
土耳其里拉上星期五一日暴跌20%，今年以來已跌咗40%。新興市場被拋窒，星期一開市南非蘭特急跌10%。因為里拉暴跌，特朗普宣佈提高土耳其關稅。
在大美元時代，
一個國家是否容易爆發金融危機主要睇兩條數，一為經常賬，另一為資本及金融賬。經常賬即貿易條數，97年泰國經常賬嚴重赤字，而現在土耳其亦係經常賬嚴重赤字。金融危機演化有條路：當國家上述兩條數赤字，遇上美元轉強，外資撤離，外滙儲備急跌，本國貨幣滙價大跌，走資進一步加劇，央行大幅加息頂滙價，股市樓市暴跌，繼而形成金融危機。
美國要求減低貿易逆差係虛，美國唔需要貿易順差。貿易戰只係其中一個手段，目的係要貿易戰引發其他問題。中國有句成語叫釜底抽薪，鍋中水大滾，要其冷卻，最根本嘅方法係拎走鍋底柴薪。中國近年四出拓殖，頗有一爭天下話語權之勢，所仗恃者乃有銀。特朗普於是先從貿易問題落手，貿易戰最後無論以乜嘢形式和談，中國貿易順差減少就意味外滙收入減少。要維持外滙儲備，就要搵其他方法引入外資。如果以開放市場吸引外資，即等同被撬開缺口。
撬開中國缺口
中國現時的產權結構國企佔大比數，撈得起嘅民企背後都有趙家人身影，故此好多事可以夾硬嚟。當缺口被撬開，能夠夾硬嚟嘅事只會越來越少，掌控力收縮。
日本經濟泡沫爆破前夕，SONY創辦人盛田昭夫及政客石原慎太郎聯手出咗本書，叫《日本可以說不》。當時SONY天價買下哥倫比亞三星電影公司，盛田昭夫認為美國人掛住玩金融，美國正在衰落；石原慎太郎認為日本半導體處於主宰地位，日本有條件同美國講數。就好似美國中咗獅子偷桃，蟠桃在握，一捏可破。結果該書出版日就係日本經濟見頂之時，然後日本經濟泡沫爆破。
金融海嘯後，全世界讚賞中國經濟帶領全球復蘇；亞投行成立，英國率先跳槽加入；IMF將人民幣納入SDR權重，作為全球第五隻SDR權重貨幣；聯儲局加息前，史無前例反覆強調忌憚中國因素。於是，中國感覺現下就係中國的時代。貿易戰之初，官媒甚至用下開戰的外交術語，結果中興（763）事件一出，先知道邊個中咗獅子偷桃。
特朗普上任時，有一種看法認為佢要個孫女學中文，代表對中國友好。但從另一角度，有一種人也需要你學習及了解，就係你嘅對手。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com