笑到最後：一招可修補港美關係 - 高明
只要委任一間美資行成為香港發鈔銀行，中國香港政府既可保「香港關係法」，又可曲線救國。 資料圖片
俗稱「香港關係法」嘅《美國－香港政策法》最近成為財經話題，中國香港政府如果想保住特別地位，其中一招，就係委任一間美資行成為發鈔銀行。
要彰顯香港獨特地
位，要數鈔票由商業銀行發行，全世界冇幾多個國家會由央行以外銀行發鈔。港元雖然掛鈎美元，但三大發鈔行中，獨欠美資行。
美國領使館向香港派定心丸，但最終都係美國總統特朗普說了便是。香港要修補港美關係，唔應該只係由商經局出聲明自稱「單獨的關稅地區」，更應喺危機發生之前，加入美資行成為發鈔行之一。他日有人質疑香港喺中國嘅獨特地位，可反駁「美資銀行有份印鈔」，話題已可終結。
事實上，發鈔銀行權力有限，象徵意義大於一切，最終香港貨幣政策都係跟聯系滙率，利率走勢大致上跟聯儲局。但畀得你發鈔，本應帶有領導同業嘅地位，不過，最近香港銀行上調新造按揭封頂息，最先由華僑永亨加，然後美資行花旗加，跟住其他銀行，包括三大發鈔銀行，都係跟加。港美有息差唔係第一日，三大發鈔行本應係同業先驅，地位穩固後反而選擇睇住人嚟跟，不如引入新發鈔行打破既有悶局。
站喺我國立場，特朗普約半年前炒經濟顧問科恩，早已被指疏遠華爾街，再加上近期批評聯儲局加息，亦令美國銀行界不滿。香港親華爾街當然有戰略意義。
而中美貿易戰中國對美國亦都冇符，淪為美國出招中國擋，新一輪談判亦冇結果。既然中國已開綠燈，畀香港政府自稱「單獨的關稅地區」，即係香港屬於可以鬆章區域。
至於實際做法，如果唔願意剔走三大發鈔行其中一間的話，可以引進多一間。先保「香港關係法」，再曲線救國，將會成為香港嘅最佳定位。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com