【財演算法】圖表派的技術陷阱2（蔡嘉民）
2018-9-4 8:46:30
上期提到睇圖好多時會中伏，因為人眼睇圖好容易有盲點，令到你唔可以好輕易咁去目測一啲嘅策略。好多時睇落得，試落又唔得，就係因為犯左睇圖上嘅錯。上次提及左一種錯誤，例如想睇下A會唔會導致B，好多人會睇下A同B
有無同時發生，即係大成交同市底有無同時就現，但真正要做嘅係，去睇下每次發生A果陣有無出現B。因為可以每次有B都有A，但每次有A都未必有B。
代入現實例子就會變成：因為可以每次市底都大成交，但大成交之後都未必見底。而回測嗰陣，因為每逢一見倒大成交就會買入，所以就會出現輸到攤攤腰嘅情況。
今次要提及嘅係另一個圖表上常犯錯誤。就係趨勢線，趨勢線可以有好多條，試想像一下，如果個股價過去一段時間愈升愈急，當佢回調嗰陣，就會有唔同嘅上升趨勢線。最先睇嘅會係最高最斜嘅上升趨勢線，圖表派會話嗰個位係第一支持。一旦跌穿之後，目光就會放遠，望更加遠嘅底部連成嘅趨勢線去搵出支持位。如果再跌穿，又會再望一條再平啲嘅趨勢線去搵支持。可惜，每次嘅支持位都好貼近，令到用家覺得可以再揸多陣，盼望去到下一條趨勢線會反彈，唔捨得止蝕。但問題係啲支持位愈黎愈低，只會令人泥足深陷。
唔係想講運用趨勢線去搵支持位呢個方法無用，只係佢並唔係一個交易嘅好策略。重點係因爲趨勢線係一條未跌穿先會畫倒嘅線，一旦有一個新嘅低位，人眼並唔會忽視新嘅底去連一條舊嘅趨勢線，跟住駁斥趨勢線唔work。所以，證明趨勢線成功嘅坊間例子中，其實有少少類似Look forward bias嘅效果，即係只有喺股價成功喺條線上面反彈之後，先至會畫出黎俾你睇。
呢一個題材係抽象啲，大家可以思考一下，下次附上圖解！
財演算法 - 蔡嘉民 舊文
來源 source: http://www.winmoney.hk