地產股企硬等《施政報告》
2018年10月10日
內地A股復市急插一日後回穩，第一日跌市係累積沽壓釋放所致。港股喺過去個幾星期大跌1600點，試咗去年七月以來低位後，亦有回穩跡象。
中環茶友留意到，呢次大市急挫有個特別現象，就係本地地產股表現異常硬淨。茶友用「異常」來形容，因為今次大市咁波動，一大
原因係美國債息飆升，連公用股都被沽低，同樣，內房股都受不利氣氛影響顯著回落。
但係對息率最敏感的本港地產股，卻跌幅有限，無跟隨大市見近期低價。新地(016) 昨日收報109.5元，逆市升0.6元；恒地(012) 報38.9元，升0.25元；九龍倉置業(1997) 升83.95元，升1.05元。
等炒公私合作
本地地產股企得咁硬，茶友解釋可能係等緊《施政報告》揭盅，憧憬當中會有措施對地產股報佳音。
今次《施政報告》中，特首林鄭月娥預告有200幾項措施，相信當中唔少都係派錢益市民。對於好多中產同年輕人而言，他們最關心的反而係樓市。
為了要寫《施政報告》，特首林鄭要覓地小組提早趕工完成中期報告，結果小組開左張無銀碼支票，只係列出五個選項，任特首發揮，所以外界估計林鄭會喺房策出招交代。
由於估計公私合作，用發展商農地起樓，係政府未來增加供應重點，加上政府好可能喺未來房屋供應中，提高公營房屋比例，私樓供應更加緊張，呢啲對本地地產股都有利好作用，所以呢個板塊，喺《施政報告》出台前企硬。
林鄭宣讀《施政報告》挺住地產股，亦令人諗起1997年董建華宣讀嘅首份《施政報告》。
當時本地樓市一片熾熱，美國利息又係咁升，阿董提出八萬五的房屋目標，當時市場當佢無到，亦對亞洲金融風暴感覺唔強烈。雖然有個別負債重的發展商開始減價賣樓，但買家仍然睇好蜂擁入市。後來美息上升未停，樓市開始轉勢大跌，阿董亦因為咁被發展商痛斥，最後仲因腳痛下台，以後政府就對樓市小心翼翼。
歷史不斷重複，但未必會以簡單方式一成不變咁再現。如今美國利息又進入上升周期，但林鄭對樓市態度顯然同阿董唔同，明眼人都睇到，特首無心打低樓市，地產股拒絕下跌，市場似乎等炒公私合作概念。但地產股係唔係真係有景，既要睇《施政報告》有幾利好，同時亦要視乎對政府執行公私合作措施的力度。否則出政策後一遇到反對，又縮埋唔搞，發展商都係中空寶。
騰訊穿底後再插
內地股市經過周一復市震盪後，初步搵到支持，但創業板指數表現疲弱，創2014年8月以來低位。上證指數收報2721點，升4點；深成指數收報8046點，漲14點；創業板指數收報1345點，跌7點或0.6%。
港股早段輕微反彈，但由於重磅股騰訊(700) 繼續不濟，拖累大市下跌，恒指收報26172點，跌29點；國企指數收報10420點，漲27點。雖然內地復市，北水仍然缺乏，成交只有854億元。
內媒報道，騰訊參與投資的遊戲直播平台鬥魚App，在國慶假期內已在各大應用市場下架，在蘋果手機程式嘗試搜索「鬥魚」，搜索結果中並沒有該款應用程式。喺負面消息不斷下，騰訊股價繼穿左300元後，昨日再跌1.7%，報293.8元，以全日低位收市。
石油相關股份普遍造好，中海油(883) 升2%；中石油(857) 升1.6%；中海油服(2883) 升5.2%。
陸羽仁
金融High Tea 舊文
來源 source: http://hdfin.stheadline.com