收市閒情 - 千頌C 2019年2月13日
收市閒情：為拉票可以去到幾盡 - 千頌C
Pierre舊年以「請幫助傷殘人士」為最佳分析員選舉拉票，今年就以古銅膚色加超結實筋肉，呼籲大家投佢團隊一票。 適中字型 較大字型
農曆新年到，各大行分析師當然要把握機會同客戶拜嚇年，更重要係要拉票！因為一年一度，由財經雜誌《Institutional Investor》舉辦嘅最佳分析員選舉又準備嚟料啦！
今年拉票時間一到，一開閘應聲彈出嘅，喂！又係你？！係花旗嘅Pierre Lau呀！噚日人日人人生日，佢就廣發Email，向各位基金客戶大派自家製生日賀年禮物，一邊祝大家新年快樂，一邊呼籲大家向佢花旗（公用股）團隊投下神聖一票，Email仲特別提到：Don"t miss our inspiring Power Video attached！
一入條Power Video，果然真係好有Power，原來係爆肌健身圖輯！Pierre一身古銅色嘅誘惑膚色，再加埋超結實嘅筋肉，360度展示人前！
話說本身都係實力派分析師，行內有聲望，所以Pierre已經贏得II Utilities組別最佳分析師超過十年。不過，佢從來都冇驕傲，亦冇鬆懈，每年嘅拉票佢都係全力盡做！努力，係有成果！睇返Pierre上年拉票方法：佢係Send一張瞓醫院嘅相畀各大基金客，仲附加一句「請幫助傷殘人士」。天呀！只係一年時間，Pierre就由「傷殘人士」變成筋肉人啦！
呢個選舉係分析員一年一度嘅盛事，你當係分析師界嘅金像獎咁樣，關乎一個分析師飯碗嘅選舉。話說呢個選舉就好多大行呀、分析師睇重嘅，出咗名，儲落名氣，他日全球經濟大蕭條，大行要炒人，有獎嘅未必有得留低，但冇獎嘅就更加冇得留低！正所謂，有獎有名氣，攞定梗冇死！所以，每年呢個時候，就係分析師好天斬埋落雨柴嘅時候，佢哋會出盡渾身解數，全力拉票！催票期開波冇幾耐，Pierre就已經去到咁盡，你叫其他分析師點算呢？
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com