MyGut者言 - 徐家健 2019年2月13日
MyGut者言：2019豬年美股運程 - 徐家健
有堪輿學家預測豬年美股運程，指美國經濟循環12年一次，現時喺頂部，即是冇得再上。資料圖片 適中字型 較大字型
有堪輿學家預測豬年大市將「先升後跌」，從玄學角度看中美運勢：「美國經濟循環就12年一次，2006年佢喺最高位，之後回落，2012年喺最低位，六年之後2018年咪最高位囉！所以𠵱家美國經濟喺個頂，到頂就冇得再頂啦；中國原來1984年行地運就行到2024年，有40年地運，2004年到2024年就旺西南水，西南有水嘅地方經濟都會上。所以，中國經濟會上到2024年，美國𠵱家到頂，即係（貿易戰）影響美國會大過中國。」
風水佬呃你十年八年，根據美國全國經濟研究所，1945年至2009年期間美國經濟循環平均約69個月，亦即不到6年一次，比堪輿學家所講的短足足一半有多。而戰前的數據，經濟循環的周期更短，經常4年左右便一個循環。可能堪輿學家定義不同，12年一次的是個大循環，都是戰後平均6年一次或戰前平均4年一次的倍數，可謂大小通吃。但要留意，4年、6年或12年一個循環都只是平均數，戰後的經濟循環短至不到2年，長至超過10年，也曾出現過。
女友Babe豬年醒過隻豬多多聲：「經濟循環兩年話唔埋，十年又話唔埋，舊年係咪最高位唔使等十年八年，下年就知。不過，大市先升後跌好似幾有道理喎。」我破除大迷信：「2018年聖誕之後美股斷斷續續升到今日，估大市『先升後跌』未必有咩堪輿學根據，估『先升』似事後孔明多啲。」Babe問：「咁『後跌』，係咪因為之後加息呢？」我答：「當年尼克遜總統畀壓力聯儲局主席伯恩斯，迫佢大選前減息刺激經濟，最後搞出個70年代嘅滯脹。加唔加息，要睇鮑威爾會唔會好似你咁口硬心軟。」
徐家健
美國克林信大學經濟系副教授
http://fb.com/economics3.0/
本欄逢周三刊出
MyGut者言 - 徐家健 舊文
來源 source: http://hk.finance.appledaily.com