港交所有水要識搵
2019年02月13日
港股好淡爭持，大股個別發展，港交所(388) 喺美資大行摩根士丹利調高目標價刺激下，股價爆升近4%。大摩吹奏摩笛，屬於較短期策略，背後其實都係炒緊內地放水概念。
港交所股價發威，一度升至253元，收市漲4.22%，報252元
。根據大摩指出，港股近期成交續增，2017年第四季達1050億元，今年以來日均達1300億元，連同上市條例改革，都有助港交所股價表現向好。該行提高2018年港股日均成交，由1040億元升至1120億元，2019年日均成交亦由1120億元升至1210億元。同時預期南下資金續升，估計2017至2019年南下資金佔日均成交將會倍增。大摩估計交投增加，主要係預期中國未來兩年有多達5至6萬億元人民幣資金流入股市，認為香港將可分一杯羹。換言之，即係炒作內地放水。
大摩點出長線關鍵
大摩不諱言稱，港交所現價等同2018年市盈率40倍，距離三年平均估值相差不遠，開始接近牛市估值，認為該股只應該策略買賣。港交所喺藍籌之中，屬高估值一族，能夠享有呢個突出地位，都係因為擁有獨特概念，喺香港股市享有壟斷地位，一來大家抱著有買貴、冇買錯嘅心態；二來內地人特別鍾情呢間公司，有啲名牌效應。
大摩從估值上評估，係從理性投資角度去睇。如果一間公司有40倍市盈率，理應要交出高增長，股市係循環性行業，起落相對大，但點樣能夠令收入長遠保持較快增長，就要考驗領導層功力。早前港交所喺倫敦請嚟公關大將，可能都係希望開拓國際市場，增加流入水源。
喺農曆年團拜時，港交所主席史美倫俾人問到新發展，特別係「新股通」有咩進展，反應似乎有啲火花。有熟悉港交所情況人士坦言，香港O依家搞股市必須北望神州。過去幾年港交所向中央提出唔少建議，部份取得突破，最明顯係中港通。不過，上任中證監主席劉士余作風偏向保守，好多港交所建議只能夠呆等，所以史美倫俾人問起新股通有咩進展，史主席都有啲你問我，我問邊個嘅情緒。
對港交所嚟講，主席啱啱換人，中證監都係新人上場，理論上中央都想搞活股市，港交所領導層要研究吓，中港兩地點樣產生良好嘅化學作用。
除咗新股通，有意見認為，近年港交所注意力似乎太集中喺新股，但好多新股上市後就走樣，之後仲可能俾人除牌，搞到好多股民怕怕，所以近月新股上市似乎都減少咗。呢個「去散戶化」現象對交投都不利，咁港交所係咪應該研究一下，點樣激活二級市場，等大家多啲買賣呢？對於呢個觀點，猛人直言知易行難，皆因從外國經驗睇，散戶買賣股票都減少緊，同時出現買賣集中喺大公司大股份，其他股份無人問津嘅狀況。
就算話減收印花稅，恐怕效應都唔會太大。言下之意，要搞好二級市場甚為艱難，與其捨易取難，不如度度點樣搵多啲新股錢。猛人之言講出咗港交所O依家嘅處境，但中環茶友「包拗頸」，認為香港同外國最大不同，就係港人有北水，而且中國人鍾意理財，同外國人習慣買基金唔同。過去散戶投入港股比例甚高，近年退場只係因為大環境唔鼓勵，慢慢搞到大家無癮，若然能夠正本清源，有全套方案去推廣，以中港民間財富同股民人數，港股又點會每日得嗰千零億成交。
大市噚日喺兩萬八關樓上爭持整固，高見28219點，再創舊年8月30日以來新高，全日波幅236點，收報28171點，微升27點，算係創咗五個半月收市高位。國指則走高27點，收報11044點。大市成交金額960億元。
食品光伏股輪流炒
主要藍籌變幅唔大，資金輪流炒板塊。內地由3月1日起，對首批21個罕見病藥品同4個原料藥，給予增值稅優惠，參照抗癌藥對進口環節減按3%徵收增值稅，內地環節可選擇按3%簡易辦法計徵增值稅。醫藥股造好，石藥(1093) 收升5.5%，報13.92元，為表現最好藍籌股；中生製藥(1177) 收升5%，報7.05元，兩隻藥股包辦最佳藍籌頭兩位。
中資食品股都當炒，海底撈(6862) 創新高，收升1.5%，報20.5元。市場憧憬下半年內地豬價造好，雨潤(1068) 收飆17%，報1.36元；中糧肉食(1610) 收升6%，報1.78元；藍籌萬洲(288) 收升4%，報7.25元。
另外光伏股發力，保利協鑫(3800) 曾飆10%，高見0.68元，收升8.06%，報0.67元；陽光能源(757) 收升6%，報0.163元。
陸羽仁
金融High Tea 舊文
來源 source: http://hdfin.stheadline.com