港股的派息護城河2020年03月03日
美股上周五一度跌近千點，收市跌357點。本地疫情過去幾日大致穩定，新增個案維持喺一兩宗，加上《預算案》派錢效應，港股噚日未有跟隨外圍美股回落，收市升161點。
大市喺26,000點暫時有支持，但實體經濟壞消息頻傳，曾經係遊客熱點嘅海鮮舫停
業，不少茶友光顧開嘅食肆都已經支持唔住收檔。一名有實力嘅大老闆同陸羽仁講，自己名下經營十幾年嘅食肆都會執笠。佢話，自己做酒樓，一個原因係呢個行業用人多，遇著有朋友想介紹親朋戚友打份工，就可以收容，加上有個地方食飯聚腳，所以搞嚇酒樓。過去生意好景時，一個月都只係賺10萬8萬，一年都賺唔到100萬，唔係大生意。但係新冠肺炎來襲，一個月就蝕過百萬，過去頂咗幾個月，已經蝕咗幾年盈利，好快蝕到入曬肉。酒樓寫信去叫業主減租，業主一口拒絕，佢睇怕至少要捱多幾個月，即是做落去，未來幾年賺錢都無用，不如執笠算數。
滙控2年收息15厘
老闆名下有多瓣生意，過去大半年生意逐步受影響。去到上個月整體生意差不多跌咗六七成，一個月要拎3、4億元出嚟撐住，酒樓唔係核心業務，首先決定放棄。不過，因為現時利息低，所以投資市場有大量資金撐住，所以股市影響唔大。從股票估值角度，公司一年唔賺錢，如果係受大環境影響，核心業務無惡化，就算股價完全無跌，都只係估值比盈利貴咗一倍，如以平均市盈率由12倍升到13倍計，等同估值貴咗8%。現時市場紛紛估計全球未來會有減息潮，過去一個月美國10年債息已由1.4厘跌至1.16厘，等同債息減了17%，喺比較回報率下，股票吸引力因為市場利息下跌而增加咗(因為避險同估計會減息)，緩和咗因為盈利放緩嘅衝擊。呢個投資回報率嘅改變，解釋咗點解實體經濟明顯惡化，股市相對硬淨嘅原因，亦說明利率走勢對股價正發揮咗撐市作用。
港股由於過去年幾都係25,000點至30,000點間徘徊，無好似美股迭創新高，藍籌股普遍派息回報高過債息。以滙控(005)
為例，喺宣佈業績後股價滑落，現時股息回報率有7.5厘，董事會期望兩年派息能夠維持。現價買入兩年期內可收取股息15%，就算股價下跌一成，扣咗收利息都仲有5%回報，比買美債嘅息口為高。滙控前景麻麻，買嚟收息有機會蝕價，但派4、5厘息嘅藍籌股現時唔少，就算買盈富基金(2800)，當中包含咗增長型嘅科網股，息率都近3.5厘，呢個回報率就發揮護城河嘅作用，喺估值較高嘅美股下挫之時，減低港股受到嘅衝擊。 中建材真係見10元
全球疫情告急下，中國公佈嘅PMI又創歷史最低，但數據愈差市場愈憧憬救市，內地股市借勢仲顯著反彈，上證指數收報2970，反彈90點或3.2%；深成指數收報11381，揚400點或3.7%。港股炒救市無內地咁興奮，恒指收報26291，只係升了161點或0.6%；國企指數收報10485，升182點或1.8%，成交1254億元。憧憬大陸放水下，藍籌內銀股走強，建行(939)
漲2.2%收報6.44元；工行(1398)揚1.3%，收報5.4元。內房股亦標青，碧桂園(2007)升近4%，收報10.72元；潤地(1109)升2.8%，收報36.95元。 內地加強基建項目提振經濟，中鐵(390)
升4%，收報4.58元；中鐵建(1186)升6.4%，收報9.49元；中交建(1800)升7%，收報6.23元；城建設計(1599)飆9.5%，收報2.43元。建材股方面，中建材(3323)飆10%，收報9.93元；金隅(2009)升8.7%，收報2.38元；海螺水泥(914)升5.4%，收報60.25元。中建材去年炒上，現時雖然殺出新冠肺炎，仍然無阻目標達成。 二線科技股繼續有炒作，5G概念股中興(763)
彈8%，收報34.8元；長飛(6869)炒高7%，收報16.48元；摩比(947)抽高6%，收報1.12元。微盟(2013)飆12%，收報5.39元；赤子城(9911)飆11.8%，收報2.56元；金山軟件(3888)升5%，收報26.45元。阿里(9988)揚2.3%，收報204.6元。 陸羽仁
陸羽仁周記 - 陸羽仁 舊文
來源 source: http://hdfin.stheadline.com