疫情的高峯是股市第一階段的低點。樂觀的預期疫情在2月尾達到高峯，加上
市場亦開始預期各大央行將會減息救市，因此股市反彈有機會在近期出現。但戲肉在第二階段。
資產炒爆就重新嚟過，過去經濟周期如此。唔畀佢爆，以印銀紙托住資產價格，其實只係以將來的生產力折現入今日債務條數；如果以負利率局人提前消費刺激經濟，亦只係消耗平民儲蓄率去填數。所以QE係吃子，負利率係坑爹。
QE比負利率有效，原因在科技進步，聽日嘅生產力會高過今日。故此以將來的生產力折現入今日債務條數有得諗。印銀紙會引發通脹，通脹會溝淡債務，而將來生產力提高可以逐漸填補資產炒爆條數。自布雷頓森林體系瓦解後，各國貨幣進入無錨貨幣體系。通脹，就係呢套體系的重中之中，全球央行最驚冇通脹。
武漢肺炎大鑊之處，係由中國開始，世界多處被迫停工。由於QE係提早折現，當經濟停頓，折乜嘢現？就算現下係疫情最高峯，之後會緩減，何時完全退散仍屬未知數，大量市民仍然唔敢開工，盡量減少生活支出，係一次被動式的經濟蕭條。
武肺恐釀惡性通脹
1929年大蕭條前，美國經濟數據亮麗，分期付款亦於20年代發明。分期付款就係提前折現最簡單的例子，件貨太貴，今日要賣呢口價，就要你用未來的收入提前折現。貨商賣到靚價，條數靚仔，但咁樣增長係咪可年年維持？1929年華爾街股災話畀當時的人知唔可以。前聯儲局主席伯南克主力研究大蕭條，其得出的結論係，炒爆咗，只要政府量化寬鬆為市場提供流動性就可以頂住。
大蕭條的教訓讓各國明白唔可以閉關，唔可以停止貿易往來，否則會全球慘。武漢肺炎卻讓各國被動地閉關，被動地停止貿易往來。癥結在一旦疫情維持一段長時間，央行減完息後可以做的只有QE。和2008年不同，在開工率不足，生產力趨下的情況QE，只會引來惡性通脹。央行係歡迎通脹蠶食債務，但害怕惡性通脹。惡性通脹會引發社會動盪，比如80年代末中國通脹率超過20%，係引發六四事件的一個重要因素。
我們明白大蕭條的教訓，可以藉由央行量化寬鬆化解流動性危機；停工下之量化寬鬆，容易引發惡性通脹；惡性通脹埋下社會動盪因子；各國政府可以將武裝部隊劃為次等特殊階級維護治權。這是步入亂世之前夕。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com