【智取大市】當負利率嚟到… - 晉佳
股神畢菲特近期將航空股清倉，再沽銀行股。資料圖片
摩通分析講到，參考歐央行2014年6月負利率令歐元區信貸明顯增加，覺得美國實施負利率1至2年會有正面效果。當負利率真係嚟到，要令銀行資金厭惡負回報而增加借貸嘅話，前提係疫情過後，經濟走出谷底，借貸變
成一項正常安全嘅生意，齒輪先推得鬱。
喺疫情過後，銀行借貸可能似足目前股市咁兩極化，負利率預期太早出現，非好事。有存續危機嘅企業，怕Total loss之下，銀行推出高息超辣條款，有危機嘅大企業喺等到更大企業或政府嚟救亡之前，面對銀行高息，更難生存，大到不能倒就會被低價入股，借貸條款先能夠回落。小企業頂唔住辣條款，怕且要滅亡。存續完全冇問題，加上增長階段嘅公司，只會面對極寬鬆借貸條件。股市兩極化，某程度上係反映上述預期。除咗等被救亡嘅大企業會好慘之外，銀行股一樣慘情，借安全錢利潤大減，借風險錢又驚收唔返，全球銀行借貸定價效率大減，未來一段時間經營將會相當慘烈。怪唔之得股神將航空股清倉，再沽銀行股。
前景不明朗會令道指再試低位（因科技股比重低）。科技股由萬億市值蘋果、微軟、騰訊，近日炒到千億級市值美團、京東、拼多多，統統夠超買，有興趣吸納都不妨等。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com