【利字當頭】救你之後逼你講我愛你 - 利世民
政府救國泰，好多人覺醒：「經營不善，係唔應該救。」呢番話確實令人感動。資料圖片
我一早都話咗，政府開壞咗個頭；邊間大企業唔掂就救邊間，最後too big to fail嘅，肯定係政府本身。
「使乜驚？信中央政府！香港只喺中國GDP嘅幾個巴
仙；香港人聽聽話話嘅話，中央一定會打救香港㗎。」Nancies呢種論點，我聽過，真係聽過。
世界點解會有「媾唔到女嘅可憐蟲」？一來，佢哋以為有錢大曬，但又唔諗嚇自己副尊容，八両金暴發戶咁樣。當佢哋乜嘢都試過但人哋唔領情，就大叫一句：「我同你有宿世姻緣！同我成親之後，你一世都係我嘅人，要日日對我講我愛你。」更加變態係，當女神話唔愛佢，佢就話女神係淫娃到處勾佬：「我就算畫花你塊面都唔會畀你有好日子過！」好心啦，做返個正常人，就會搵到朋友，搵到愛人。
講返too big to fail。早排陳茂波話，中央大把錢，香港有事就一定救。我只係好奇一問：「人民銀行有美元儲備，亦可以印人民幣，但係如果要救香港，一係就消耗儲備，一係就印人民幣去換美元，無論點都會影響到『國家貨幣安全』喎，條數點計呢？」
最近，Kyle Bass出咗隻新基金，賭港紙跌，槓桿200倍，lock-in兩年。先此聲明，我絕對唔懷疑香港金管局捍衞港元嘅能力，但實情係香港無lender of last resort；政府又救海洋公園又救國泰航空（293），假如有朝一日有銀行出事，政府救唔救？又有冇能力去救？救唔到，又點算？假設性嘅問題，政府絕對有權唔答，但對於呢啲可能發生嘅情況，政府又有冇準備？等中央救，然後大家就要日日講：「國家，我愛你？」
「經營不善，係唔應該救。」見有好多人覺醒，我好感動。有時我都唔知，家陣係咪丁蟹搵人扮古惑仔，但到真係有日出現真嘅衝擊，佢又係咪英雄呢？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com