金融High Tea 2013年2月15日
金融High Tea——股紅金黑有啟示
2013年2月15日
蛇年開盤，股市開紅盤，恒指能保持勝局，升198點收場，九九金就未能紅盤高開，開市即跌322元，全日收市亦要跌，係六年來首次。
恒指在農曆年後開市老例高開，問題唔係高開，而係能否保住高收，港股昨日一度有啲樣衰，恒指挨近23500點就無力再上，升幅一度收窄至只有85點，低見23301點，好彩隨後又一路震盪走番高，最終收23413點，升198點。
蛇仔股市過去唔係幾老嚟，過去三年蛇年都跌，上一個蛇年2001年仲大跌33%，今年歐美以至中國去年第四季經濟開始回暖，希望港股今年可以打破過往三個蛇年厄運。估計恒指短線會在23500點間窄幅浮動。
收紅盤年例升
自1999年的兔年至今，14年的新春開市全數皆開出紅盤，相信是交易員迷信紅盤好意頭，一開市齊齊嘜價所致，但收唔收到紅盤，才反映實際市況。以創高位的2007年為例，港股開紅收紅，這個豬年就升14%。2008鼠年金融風暴年，這一年農曆年第一日開紅收黑，當年勁插46%。到2009牛年開紅收紅，當年大反彈勁升61%。2010虎年首日開紅收紅，亦升18%。2011年兔年新春首日，開紅收黑，當日就大跌355點，當年股市即刻唔掂。舊年龍年開紅收紅，全年升15%。新年首日收市和當年相關性咁高，真係唔信都要睇睇。
昨日收到紅盤，係唔係代表今年股市可以睇高一線？要小心即使全年計係升，都唔代表由年頭升到年尾。
金市昨日開黑盤，可見金市較弱，雖然金銀貿易場話在美國量化寬鬆之下，金價下半年會挑戰1900美元的高位(現時是1641美元)，但我就唔係好信。雖然美國不斷量寬，但最近幾個月金價唔係幾好力，金價今年跌了1.9%，和股市背馳，相對地油價好啲，今年升了5.7%，接近美股升幅。
金股少掂為妙
我估金價唔得，係大投資者開始預期環球經濟慢慢復甦，美國不會無限量寬兼無限低息，所以唔敢再買金，其實係炒緊轉勢。偏低的東西好可能繼續偏低，你睇金股真係唔係幾掂，好似隻紫金(2899)，呢一排人升佢唔升，股價圖好似見一個高原跟住下插，雖然昨日升0.8%，金礦股都係不掂為妙。
日前內地公佈醫藥藍皮書，指過去2005至10年，藥品市場複合增長率超過20%，2012年市場規模達到9261億元。預期2013至2020年，中國藥品市場規模將以年均12%的速度繼續高速擴容。
醫藥及相關股昨日炒味濃郁，昨日全線炒上。上海醫藥(2607)漲超過半成，同仁堂(1666)升6%。不過宏觀分析利好，唔係咁快反映到公司業績，炒股要睇路行。
陸羽仁
上一頁 下一頁
金融High Tea 舊文