金融High Tea 2013年2月4日
金融High Tea——2013大戰連場?
2013年2月4日
美股在上周五2月第一個交易日，杜指大升149點，收14009點，咁就上咗14000點樓上，繼標普500指數破1500點後(而家1513點)，再一個指數上衝重大位關口。
美股上升和就業數據有關，雖然最新的美國1月份非農業就業職位新增只有15.7萬個，仲低過市場預期的16.5萬個，但同時大幅調整過去已公布的去年11月和12月非農業就業數字，將11月已公布的新增職位初步數字16.1萬個，大幅向上調升至24.7萬個，而12月數字亦由原先公布的15.5萬個，大幅向上修訂至19.6萬個，令這兩個月非農業新增職位額外增加12.7萬個。不過，新公布的美國1月失業率微升至7.9%，較市場早前預期維持7.8%不變略高。
這就出現一個奇怪狀況，去年尾段新修訂職位數字大增，顯示經濟唔係咁差，但1月失業率微升，又確立以失業率為指標的聯儲局，不會提前停止QE(量化寬鬆)，所以股市大升。
日圓大跌 亞幣搶跌
2013年很快過了一個月，金融市場發生好多大事，包括日圓大跌、債價回落、股市上升，幾個巨大市場一齊郁動，顯示市場的大大戶睇市的態度有變化。
最誇張的是匯市，今次由日圓做主角，先睇睇一系列數據。
今年至今短短一個月，在日本自民黨新政府上台後，大出口術唱低日圓，仲要逼行將退休的日本央行行長白川方明放水插日圓，結果相當成功，跌得最厲害的也是日圓，美元兌日圓短短一個月內升了7.2%，歐羅兌日圓更升得勁，大升10.8%，咁短時間好像大陸移了位一樣。
反觀美元其實無郁，反映美元兌主要貨幣匯價的美元指數今年至今微跌0.7%，無大變動，其實美元只是在79.2低位徘徊，無跌唔等如強。去年9月美國聯儲局宣佈搞QE3(第三次量化寬鬆)前後，美元指數插向79的低位，之後在去年11月中反彈上81.5，如今再回到79邊，都是在低位遊走。而人民幣跟住美元走，今年至今美元兌人仔微跌0.07%，差不多無郁，即係人仔跟住美元在低位。大貨幣中主要強的是歐羅，兌日圓升10.8%，兌美元升3.5%。
美國放水在先，日本放水在後，歐洲唔放水就老襯，匯價不斷上，對經濟負面影響日大。而且美日放水，銀紙愈印愈多，催升資產價格，全球通脹向上，在貨幣大增加上經濟復甦預期下，原油今年至升了6.5%，升到97.8美元一桶，睇嚟破100大關指日可待，對航空公司比較不利(如國泰(293))。
股市搶高 未到癲價
再睇股市，匯率低增加出口利好股市，在三大儲備貨幣國中，匯價最弱的日股升7.7%，美股杜指今年至今升6.9%，而匯率高企的歐洲就唔係咁得，《金融時報》泛歐100指數只升2%。在亞洲，港股今年至今升了1100點，升幅4.8%，內地上證綜指升6.6%，港股升幅跟不上中、美股市，但若單看國企指數就升6.8%，拍得住中美股市。雖然美股接近高位，但2007年美股杜指上14000點時預測市盈率係22倍，但而家雖然又係14000點，但現在的預測市盈率只係14倍，比美國平均市盈率15倍仲要低，所以你唔可以話美股貴。港股仲低啲，2007年上32000點時預測市盈率高達20倍，?家只係11.1倍。雖然唔排除股市升得多會調整，但股市基本上唔算癲。
貨幣戰爭 債災隱現
真正癲的是債市，由於聯儲局不斷量寬買債，推高債價，藉此推低市場利息，債市泡沫湧現，今年1月美國國債債價開始下跌，10年期國債債息由1.6厘升上2厘。債券投資者開始炒經濟復甦，亦怕未來利息向上，就將資金從債市調走。
而家環球金融市場兩大熱話，一個係貨幣戰爭，另一個係國債債災。美元貶值在前，日圓貶值在後，為一場貨幣戰爭拉開帷幕。這是零和遊戲，令貶值國出口得利，升值國受損。歐洲反應出名慢，主宰歐盟的大國德國又反對放水，恐怕短期內唔會回應，難阻美元、日圓低迷之勢。亞洲及甚他新興國家叫苦連天，紛紛壓低本國匯價回應，單是上星期，南韓圜已跌了2.1%，新台幣亦跌1.4%。各國又放水、又干預、又減息，競相貶值的後果是資金成本更便宜，資產泡沫更大。
固然，瘋狂印錢唔係無後果，特別係印得最誇張的美國。負責管理1750億美元債券的富蘭克林鄧普頓環球債券部聯席總監Michael Hasenstab就向投資者發出新的警告：「立刻退出所謂安全的國債，否則就太遲。及早退出的負面影響非常有限，不要去接最後一棒。」
高盛亦對債券市場的泡沫變得愈來愈緊張，高盛頭頭近期在不同場合示警，高盛首席執行官Lloyd Blankfein去年12月在《紐約時報》的研討會上表示，債券市場崩潰的風險愈來愈大，而投資者似乎並沒有做好準備。高盛二把手首席運營官Gary Cohn上周在達沃斯全球經濟論壇亦表示，利率遲早將會上升，過去三年進入債券市場的資金將有部份會流出。但許多銀行與投資者並沒有對債券市場泡沫可能突然破滅，做好準備。高盛在2007年美國房地產泡沫破裂前，亦大手賣空抵押債券，結果在樓市崩潰時大獲其利，不知今次會否又不幸言中。
你可能問呢啲宏觀走向對我哋有乜影響？我試吓估一估。第一，短期各國競相印錢鬥貨幣貶值，資金便宜，推升股市，特別股票市盈率唔算高，似乎仲有得玩吓。
生意難做 股票照炒
第二，資金氾濫推升通脹甚至滯脹，損害經濟基礎。健康的通脹是經濟增長物價上升，不健康的滯脹是經濟停滯物價上漲，中期看出現滯脹的風險不低。以在香港做生意為例，鋪租升人工升，但生意無乜升。好似銅鑼灣、尖沙咀租金全是喪價，但大陸遊客生意無大好轉，有名牌表行在上月降價20至30%，以搶救下跌中的生意，成本大升生意不升反跌，會損害企業盈利。不過你唔好聽完我講馬上去沽鐘錶珠寶股，沽完見佢再咗唔好搵我，因為事物發展有一個過程，基本因素反映出來要一段時間，可能要四、五月，甚至七、八月先至見到。
第三，債市爆煲樓市跟爆。中長線睇，美債千萬不要爆煲，一爆利率急升，本地樓市亦好易爆煲。我經常講，唔狂升的市場，唔會暴跌，而家香港樓就在狂升中。大角咀有個在舊區中間的樓盤，開出40月的長期樓花，擺明長過三年特別印花稅的期限，博你買來炒，不過樓價貴得驚人，以建築面積1016平方呎單位計(實用率只有七成實用面積716平方呎)，建築面積平均呎價13589元(實用面積平均呎價19282元)。近1.4萬元的建築呎價，買舊區單頭物業，即使即供有折扣(但要供三年幾)，都係貴得驚人，若果市場差啲，呢類單位5000元一呎都唔係咁易去，同而家的高售價比低6成有多。我唔係話樓市馬上會爆，但萬一過一年半載債市爆煲利息大升時，本地樓市想頂都頂唔住。
總之今年唔會係一帆風順的一年，只睇頭一個月咁多大變就知。今年炒作要順勢而作，適可而止，唔好去得咁盡。
陸羽仁
上一頁 下一頁
金融High Tea 舊文