金融High Tea 2013年2月7日
金融High Tea——唔怕市跌怕硬炒
2013年2月7日
■人行前日進行4500億元的逆回購操作，創下央行單日逆回購操作的歷史最高紀錄。新華社
■美銀美林繼續做好友，認為發展商股價較歷史平均價有19%折讓，目前係買入時機咁話。
歐美股市反彈，美股上日彈到接近14000點，港股雖然跟外圍反彈，不過彈力認真麻麻，恒指上日勁插500幾點，中午一度升超過200點，但已經無力再上，尾市升幅一路收窄，收市小升108點，收23256點，升幅只有0.5%。
我留意到兩大種股票的走向，會左右港股大市，一是內地銀行股，一是香港地產股，昨日狀況是內銀股弱，地產股硬，當然多少也反映早前跌得多反彈得多的因素，也顯示市場怕內地收水，唔怕特區政府打擊樓市。
傳內地收緊貸款
內地春節前銀根例緊，因為不少企業要在春節前結清全年欠帳，中國人民銀行前日進行4500億元的逆回購操作(即透過回購債券向市場放水)，創下央行單日逆回購操作的歷史最高紀錄，但與此同時，又傳出中行(3988)、工行(1398)因新增貸款超額投放，早前被央行約談，雖然這兩條消息看似矛盾，但央行在春節前用逆回購方式放水，只屬節前短期措施，但約談放貸過度的銀行，卻顯示央行不希望銀根過鬆。
雖然官方新華社一度否認，但據《上海證券報》報道，中行確有收到過限制新增貸款投放量的通知。由於央行有控制銀行放貸的訊號，令大家擔心股市炒作難以持續，港股前日急跌500點，和內地收水的傳聞有關。昨日內銀股亦特別腳軟，兩大主角中行股價無起跌，工行更逆市跌0.2%。
好多朋友關心呢兩日這一跌是否預示股市見咗個小頂，我認為港股受外圍影響，美股杜指見14000點後有啲窒步，本來已不利好，港股短期內若要衝高，更依賴內地股市助力，若阿爺收水，都唔好對內地股市有過度期望，加上內地就放長假，港股自由飛行，都係保守少少好啲。
有讀者問我最近高追了一些股票，大如中國海外(688)，小如二三線新能源股，問我點睇，若睇好大市，好唔好「轉作投資」？
我對呢啲「轉作投資」的說法極為反對，所謂「轉作」，即係話本來唔係諗住投資，見股市熱入市短炒，但結果事與願違，跌咗落來，又唔想止蝕，期望佢回一回又炒番上去，所以想轉作投資睇長啲。我就話投資還投資，投機還投機，在1月打後呢啲位入市，以投資計短期都算高位，唔係幾入得過，投機就無所謂，守到10%止蝕就可以，千祈唔好無端端又轉作投資。
即使大如中國海外，最近都跌得較急，佢而家50天線是24.02元，昨收22.3元，走勢轉差，揸咗佢唔好咁多判斷，到止蝕位最好打靶。唔怕市跌，只怕硬炒，買股睇錯跌咗唔緊要，按位止蝕只係輸10%，但你唔認衰硬要炒，扮投資，結果隨時輸更多。
熱傳政府出辣招
昨日地產股都有反彈，但市場熱傳港府最快會於本周五推出多項打壓樓市新「辣招」，包括向買第二個物業徵收5%特別印花稅(SSD)；上調買家印花稅(BSD)至30%；叫停銀行提供第三套房按揭，同時收緊逾800萬的物業按揭成數；以及加推10000伙遠期居屋樓花等等。
不少證券商估計政府可能再出招，例如美銀美林認為，政府短期可能推新措施，但只會令二手供應繼續減少，資金會逐漸流向商業物業市場，美銀美林仲繼續做好友，甚至認為發展商股價較歷史平均價有19%折讓，目前係買入時機咁話。我就話若政府再出招，地產股再跌一跌，會將大市再拖低啲噃。
陸羽仁
上一頁 下一頁
金融High Tea 舊文