金融High Tea 2013年2月8日
金融High Tea——急景殘年
2013年2月8日
過埋今日就放農曆年假，在此預祝大家蛇年買股頭頭是道，路路亨通。香港下周放三日假，但內地放足一個星期。我打畀內地財經界朋友，好多個心都飄咗返老家，無乜心情交易，好一個急景殘年的現象。
港股上落唔太大，但反彈乏力，最後跌79點，成交有790億，皆因恒指換馬帶動基金轉倉盤。
今次恒指成份股變更，有少少預期之外，所以受惠者升幅較大，如聯想(992)重新染藍大升5.2%，成交亦增至9.3億元，成交比前日大增近一倍，其中不少是按恒指佈陣的基金補貨所致；而友邦(1299)因股份全流通，而獲得調升恒指比重，亦逆市上升1%。
被剔出成份股的中鋁(2600)則跌2.76%，銀娛(027)入成份股不成，兼且遇到中央整頓疊碼仔消息，炒入指數的小戶暫時先吃一棍。
買指數股避大災
美國愈來愈多投資者，將錢放入指數基金，而唔係傳統的自主投資基金，皆因指數基金經理無乜嘢做，只是跟指數成份股變，自主基金要主動揀股，所以指數基金管理費低很多。如果自主基金回報好高，客戶都無乜怨言，衰在近年好多基金都跑輸大市，即係買管理費低的指數基金，好過買芬佬亂咁揀股的自主基金！
好多散戶買股頭頭碰着黑，唔貴唔衰嗰隻唔買，又唔識得止蝕，我會介紹佢哋買指數基金。到今天個市仲係升唔少，都有好多散戶打電話問功課，謂三四年前買咗好多熱門新股，都唔係細股，但到?家係只得三分之一、四分之一。反觀大市追番當日指數位都追到七、八成，若然只係買指數股，會輸少好多。
其實背後都有原因，因為唔少新股都喺市旺時上市，有時興資源股，有時興消費股，我記得嗰隻博士蛙(1698)，在2010年底上市時，我彈佢市盈率貴得驚人，上市時炒到7個幾，舊年去到2個幾停埋牌至今未復牌，當日揸咗佢唔識走，真係喊都無謂。同期揸國企指數，?家只差1、2％就到家鄉。唔識揀股，不如買指數股。
內銀節前回吐
農曆新年長假期前夕，連升多個星期的內銀A股，昨日遇到沽壓，連帶令金融股佔比較重的富時A50指數，大跌近1.5%，令安碩A50基金(2823)跌2.3%。
跌得較多的民生銀行A股跌6%，連帶H股(1988)要跌5%；重農行(3618)收市後公佈非執董涂明海因涉不報安全事故遭刑事拘留，股價先跌4%(其實同上市公司無乜關係)；四大行以農行(1288)跌3%最多。
內地早前傳聞人民銀行勸告中行限制1月新增貸款投放量。不過，踏入2月，首3日內地四大銀行信貸投放已接近2000億元人民幣，大幅增長。
建銀國際環球金融策略及銀行研究部董事盛楠日前表示，自去年央行兩次降息，令內地大型銀行首季淨息差受壓，料首季淨息差按季下跌10至15個基點，對小型銀行影響較少。相信第二季內銀重新為貸款定出息價後，次季壓力將見底。
建銀國際預期今年整體大型內銀盈利增長10%，小型增長約15至20%，總整表現不及去年。大型內銀股價自去年12月至今上升約50%，小型內銀更上升一倍，估計都係時候唞唞氣才可以再上。
個股方面，較看好工行(1398)及民行(1988)；短線則看好農行(1288)及重農行(3618)。
陸羽仁
上一頁 下一頁
金融High Tea 舊文