金融High Tea 2013年4月12日
金融High Tea——居屋慢銷飲得杯落
2013年4月12日
■「綠悠雅苑」揀樓程序約有四成七中籤者棄權唔揀樓，不過茶友話樓市近日氣氛稍為冷卻，且有人抱着「唔執輸」精神來抽，故仍算預期之內。
■中資保險股個別發展，平保及財險靠穩，國壽則回吐1.7%。資料圖片
人行昨日公佈3月份人民幣貸款增加1.06萬億元人民幣，較去年增加515億元，高過市場預期的9000億元。3月外幣貸款餘額7543億美元，增加34.8%，一季度外幣貸款增加709億美元。
喺外資紛紛向內地增長轉抱懷疑態度下，呢個已經算係好消息，內銀股幾乎全線造好，中資保險股個別發展，平保(2318)及財險(2328)靠穩；國壽(2628)近日有花旗等大行唱好，連續兩日升超過4%，昨日回吐1.7%至20.6元。
港股繼續飲「弱水」
由於美股再創新高，內地A股朝早造好，恒指高開164點後保持強勢，但始終突破唔到20天線。午後A股走樣，由升轉跌，拖累恒指大幅回調，收市升幅縮水至只有66點，收22101點，國企指數依然係弱勢，午市一度由升轉跌，臨收市後抽收復失地，收10708點，微升14點。大市交投繼續呆滯，成交只有579億元，繼續保持外圍升多、香港升少的格局。
樓市始終係市場焦點，近日市場好淡夾雜，會德豐用二十幾億元買入將軍澳地皮，計落要四千幾元一平方呎地價，計落唔算平，另一邊廂，房協推出青衣的新居屋「綠悠雅苑」進入揀樓程序，首三日合共售出333伙，佔整個項目單位量34％。不過，獲邀揀樓的申請者人數實為620組，約有四成七中籤者棄權唔揀樓。中環茶友話，居屋事隔多年重出江湖，好多人會抱着「唔執輸」、先申請才算的心態，最終有一至兩成申請人放棄毫不出奇，尤其樓市近日樓市氣氛稍為冷卻，令額外一至兩成人因而打退堂鼓，故首三天超過四成人放棄揀樓的情況仍算預期之內。不過，由於超購倍數太勁，相信988個單位最終能全部售罄。
二手樓市同新盤氣氛觀望，反而發展商投地仲未見手軟，茶友同買咗地的發展商傾開偈，佢解釋話若然唔係呢個時候出手，根本好難同幾個龍頭地產商爭地，所以落標都唔敢太低價。有人奇怪，政府未來擺明會增加供應，地皮陸續有來，咁點解唔等跌價先買？佢就反問，政府話今年會推兩萬個單位的地皮出街，但你有無睇勾地表，有幾多塊地仲未過城規會先？如果你等執平地，點知等到幾時，好似炒股咁，既然想入貨，咪先落住一注半錢先囉，但香港咁多地產商，人人落住一注，都唔係咁易執到平地㗎。
樓價一跌少人吼
呢位發展商仲話，而家居屋咁多人棄購，證明樓市需求其實好虛啫，個市一跌就無人買㗎啦，咁樣政府仲點解要干預呢？從呢個角度睇，佢仲覺得係好消息𠻹！
自從政府推出雙倍印花稅及金管局在2月底上調住宅按揭風險權重，本地主要地產股股價已跌3至14%。高盛指部份發展商的市盈率處於沒有任何銷售的假設，甚至低於出租股，銷售前景遭低估。
該行認為，由於政府政策主要打擊房地產投資需求，持有較多豪宅項目的發展商，被逼要減價去貨，中低價樓一手市場價仍然可以企得較硬，地產股仍有可為，上調多隻地產股目標價。受高盛唱好，地產股普遍造好，長實及新地靠穩，新世界及恒地(012)升超過1%。不過，無論大行點唱，樓價喺家等如被政府封頂，對散戶嚟戶，呢類股份都係只宜低撈，切戒高追。
陸羽仁
上一頁 下一頁
金融High Tea 舊文