金融High Tea 2013年4月18日
金融High Tea——㩒住砌
2013年4月18日
黃金價格觸底反彈，市場投資情緒本來轉暖。隔夜美股反彈，收復上日大部份失地。內地A股先跌後回穩，但臨收市前歐洲又傳出意大利財政問題，港股翻叮上日A股收市後插水動作。
兩地金融股都無運行。恒生金融分類指數跌0.6%，恒生中國H股金融行業指數插1.4%。匯控(005)終於跌穿80元，收報79.95元，係四個月低位。
彈吓跌吓慢慢食胡
內地首季經濟增長差過市場預期，評級機構高度關注內地銀行的地方債水準，繼惠譽下調中國主權評級後，穆迪將評級展望由「正面」轉為「平穩」。內銀新增貸款經過上月「井噴」後，本月或再次「縮水」。《中國證券報》報道，預期內地4月新增貸款會回落，四大國有商業銀行4月份首周信貸投放約560億元人民幣，按月持平，預計今個月金融機構新增信貸投放將達8000億元。另有消息透露，近期或有外資繼續做空內銀股。內銀九行全線下挫，最弱係民行(1988)，插4%。
穆迪同時對內險股有所行動，雖然維持國壽(2628)「A1」的保險財務實力評級，但將評級展望從「正面」下調至「穩定」。評級公司咁搞法，令到中資保險股除財險(2328)逆市靠穩外，其餘全部向下。
在負面消息下，恒指最後一個小時跳水超過180點，收市倒跌102點，收21569點，國企指數繼續跑輸恒指，跌125點至10300點。大市全日成交623億元。睇嚟淡友會繼續㩒住個市砌，等個市彈吓跌吓慢慢食胡。
港鐵同政府宣佈新票價機制方案，根據建議，港鐵按機制計出來的票價加幅，會由原先3.2%減到2.7%，連同其他優惠，客運收入加幅跌到1.1%。方案公佈後，自然有報紙話減得唔夠，中環茶友就笑言，上市公司必須平衡股東同公眾利益，若然新機制公佈後，輿論一面倒讚好，即係代表管理層讓步過多，無保障股東利益，家外界有咁嘅反應，只要方案過到骨，咁對管理層嚟講，外界批評即係等如讚譽，反映公司幫股東爭取到最大利益。
港鐵有砌數高手
對於今次方案，茶友話港鐵咁大間公司，當然有大把財務高手，幫佢砌出條靚數，搞到今年加價幅度都算好溫和，方方面面都靚靚仔仔，至於將來係點，就過咗海係神仙啦。家做大生意脫離不了要有政治手腕，港鐵的票價機制，若然傾唔掂就只有原地踏步，現在管理層拋個方案出嚟，今年可以大幅削減加幅，議員只有要定唔要，估計最大機會佢哋係一邊食、一邊鬧，總之各自做好自己角色啦！
在世界各地，鐵路生意都係唔易做，香港地少人多，營運效益特別高，令客運效益勝過絕大部份同業，其餘地產、零售同廣告收益就豬籠入水，使香港鐵路網絡成為一間可以賺錢賺到上市的生意。由於目前地鐵主要股東係香港政府，盈利超過一半入咗庫房，故此公司賺錢，大家都不必太眼紅。
港鐵喺2000年上市，當時股價9.38元，十三年過去，股價翻了兩番，尤其近一年表現較好，昨日收報30.4元，一年高位係32.9元。消息公佈後股價保持平穩。由於港鐵收入同客流及樓市掛鈎，在自由行有封頂壓力同樓市放緩下，幸好業務性質穩定，估計未來股價表現應該平平穩穩。
陸羽仁
上一頁 下一頁
金融High Tea 舊文