金融High Tea 2013年4月8日
金融High Tea——乾坤大挪移
2013年4月8日
港股上周五都算跌得甘啦，一日大插610點，跌到21726點，跌幅2.7%，冠絕全亞洲，今次唔賴得內地股市，因為內地仲放緊清明假無市，經紀張話市場傳來傳去都係傳北韓打仗，我就反問乜香港好近北韓咩？南韓股市都係跌1.6%，點解香港要跌多咁多？
我就話香港之跌，牌面是內地禽流感爆發，牌底是日本大力印銀紙所致。港股全線跌，但航空股跌得最厲害，可見投資者怕2003年沙士重現航空公司無晒生意。國泰航空(293)上周五跌4.1元去到12.28元，內地航空公司仲跌得誇張，國航(753)大插9.8%到6.05元；南航(1055)插8.5%；東航(670)跌8.3%，幾隻股都係一條大陰燭咁插落嚟。禽流感爆發區係上海一帶，理論上東航受影響較大，但上周五當日反而係東航的反彈力較佳，佢當日最低跌過11.5%，最後收窄跌幅至8.3%，幾隻航空股都係東航中線走勢最好，應該和去年佢盈利較佳有關，佢家市盈率只係9.5倍，係幾隻內地航空股中最低，東航去年盈利跌36%，和國航相近，南航同期跌48%，高下立判。
禽流驚嚇航空大插
國泰股價近期走勢好差，今年1月底炒上高位15.78元，家得番12.28元，高低唔見咗22%，若高位買入10%止蝕，要止蝕兩次都唔止，可見高位買股之痛，亦是我在年頭唔願意畀「今年推介股」或「利是股」的原因，因為年頭根本不是買股的時機。國泰咁跌法已經離去年5月18日全年低位11.76元好接近，但我都唔係好鼓勵大家去撈國泰，要撈不如撈國航、東航好啲。以國航為例，52周低位4.4元，家6.05元，若再跌多1元插穿埋5元水平，可以開始分段買，預料佢今年低位會高過去年的4.4元，但國泰就有插穿去年低位11.76元的可能性。
我估今次禽流感有七成機會不會爆大鑊(如2003年沙士那一種)，但也可以嚇到投資者腳軟，混亂中航空股有可能快速尋底，但太快手太「高」位入場，一買再插，就吃足眼前虧。想買平貨，要有忍功。另外講多句隻喪升股泰凌醫藥(1011)，上周三炒禽流感概念大升17.7%，上周五假後再升9%，當日最高升過19%，即係高位買咗已唔見9%，成交近4000萬，好多股轉咗手。奉勸唔炒慣喪股者唔好玩啦，命仔緊要呀，最慘係炒喪股佢喪升時你唔想賣，想賣時已大跌。
我暫時唔覺得禽流感單嘢會有深遠影響，反而認為日本大放水的長遠影響更大鑊。日本新任央行行長黑田東彥在香港放清明節假期間，掟咗個核彈，佢呢個金融核彈，比北韓領袖金正恩日日話要掟又無掟出手的核彈，厲害一萬倍。日本央行決定，為達到日本每年有2%通脹的目標，決定將印銀紙量化寬鬆買資產的規模，倍增至每月7萬億日圓(790億美元)，遠高於市場估計的4至5萬億日圓。
日本印鈔 美國三倍
家美國每月量寬買債的規模是850億美元，相比之下日本買790億好似唔係好多，但乜嘢都講比例，唔止講實額，一個六呎大人食個麥記巨無霸唔算多，但一個兩呎小學生食同一個巨無霸就一啲都唔少啦。日本經濟總量(以GDP總量計)只是美國三分之一，換言之日本量寬規模實額好接近美國時，按經濟規模比例計差不多是美國三倍，你諗吓美國家每月印銀紙850億美元，一年1.02萬億美元，若美國以日本同等比例印鈔，即係一年印鈔3萬億美元！可見日本央行行長黑田東彥印鈔之狂，遠比美國聯儲局主席伯南克更甚。
以日本央行的量寬速度，兩年左右，日本就可以將自己的貨幣基礎增加一倍至270萬億日圓，升至日本GDP總量的50%，印錢速度十分驚人。相對地，美國家的貨幣基礎係3萬億美元，GDP總量係15萬億美元，現時比例只是20%，以美國印鈔速度，量寬多兩年只係增加2萬億美元，相對於15萬多億美元的GDP，只是33%。美國已在瘋狂印鈔，但日本後來居上，成為印銀紙冠軍，認真得人驚。
沽國企股 買東洋股
今年初聽到日本換央行行長會大印鈔，市場還有一些分析讚好，話日本又量寬，熱錢湧出，對包括香港在內的區內股市有益咁話。我當時對此甚有保留，美國印鈔也只益到美國股市，而抑壓了香港和內地股市，如今日本又狂印，而且佢咁近中國、香港，負面影響豈不是更大劑？
上周五的市況是日本宣佈大印鈔後的即時反應，已出現乾坤大挪移，資金從香港和南韓等地股市撤走，流入日本股市，所以日股升1.6%、港股跌2.7%、南韓股市跌1.6%。恒指去年底收22656點，至今跌咗930點，今年至今跌幅4.1%，國企指數今年至今跌8.8%，內地上證綜指今年至今跌1.9%(但上周五無市)。但反觀日股，由去年底的10385點，升到上周五的12833點，今年至今大升23.4%(日圓同期跌11%，買日股者亦可同時沽日圓對沖匯價風險)，氣勢如虹。其實外來資金在今年年頭炒上本地股市、特別是炒高紅色股後，早已沽貨散水，逐步移去炒日股，如今黑田東彥放水手法比想像中更烈，加上借迴避中國禽流感之勢，可以想像有更多資金會從中港股市流向日股。
唔少人批評日本咁瘋狂印鈔得唔得？全球最大債券基金Pimco的行政總裁Mohamed El-Erian警告話，日本央行進行一個前所未有的實驗，同美國一樣，就係使用增印貨幣這一套不完美的工具，去刺激疲弱的經濟，結果都只係谷高股市，但經濟卻依然故我。我都話日本經濟唔好唔去做結構調整，重整大財團高企的債務，改善因長期缺乏投資導致低下的生產力，只是印鈔去虛升需求，遲早會將日圓變成軍票。
內地從緊 壓抑股市
不過唔好理日本大印鈔對佢自己的經濟得唔得啦，佢咁做首先對鄰邦遺害好大，的確是一個「以鄰為壑」的政策，即是害死鄰居益自己的政策。美國經常批評中國壓低貨幣匯價，話中國係「貨幣操控國」，家日本咁濫印鈔票推低貨幣匯價，為何美國不阻止日本這樣做？日本是美國忠實盟友就隻眼開隻眼閉，日本、美國咁印鈔，中國、南韓亦無得學，因為日本、美國經濟不好有通縮，印錢頂番上去啱啱好。但中國、南韓經濟好有通脹，一增加貨幣供應，通脹馬上失控，中國2008年推4萬億人民幣救市，就引來通脹失控的問題。
投資者避開香港和內地股市，將資金轉投日本，也有他的道理，日本咁印鈔有幾大根本影響︰
第一，日本推低貨幣利出口，對中國、香港和南韓的出口都有負面影響，你賺少啲，佢賺多啲，會在各地經濟增長和公司利潤反映番出來。
第二，日本咁印錢法會令熱錢外流，借日圓去炒其他嘢都得，如有熱錢流入中國，只會令中國通脹升高，進而約束中國股市，所以仍然係睇淡。
第三，炒日本股唔使炒外國股，食「買日股沽日圓」這個套餐，成功機會好大，外國資金何須冒險炒其他國家股票，至少等你跌一大浸再講啦。
睇住日本咁，我畀大家的投資建議是不宜太快妄動。中國貨幣政策趨緊，不利股市，人民銀行貨幣政策委員會發表首季度例會報告，指內地物價走勢存在不確定性，人行對未來通脹形勢的警覺度將提升，報告引述市場預期，「下半年不排除有加息之舉」，人行開始暗示加息，以壓抑通脹預期，形勢對股市不利，估計股市有幾個月要繼續反覆尋底，最怕你無錢，不怕無平貨執也。
陸羽仁
上一頁 下一頁
金融High Tea 舊文