金融High Tea 2013年5月14日
金融High Tea——焗買房產基金
2013年5月14日
外圍無乜事，港股唔生性，人升我跌，內地上證綜指少回0.2％，恒指大插331點，跌幅1.4%，國企指數大插2.1%。
中資金融股拖累大市，主要係靠大笨象匯控(005)頂住，被渾水研究沽空狙擊的渣打(2888)就慘啦，股價午後跳水，收市急插4.8%至180.8元。
中資金融股可說是內外夾攻，外有評級機構穆迪評論，內有中國審計署發難。國家審計署公佈，包括建設銀行(939)、農業銀行(1288)、中移動集團等十三家國企及金融機構，過去數年有違規貸款、亂發員工福利、未獲批准興建項目的問題。審計署指建行、農行及進出口銀行的北京、上海等地分行，向不合資格的企業及項目，有呆壞帳的風險。審計署咁講，已嚇到投資者腳軟。
再加上穆迪副總裁及高級分析師胡斌又提出中國影子銀行的問題，話佢哋缺乏透明度且發展迅速，對中資銀行有好大的潛在風險。穆迪估計，截至2012年底，影子銀行規模為人民幣29萬億元，等同GDP 55%。
審計揭黑內銀腳軟
所謂影子銀行，包括信託公司、投資銀行、各類基金、債券保險公司等非銀行金融機構。過去兩年中央收緊銀行貸款，令影子銀行增生，高息借錢畀公司周轉，由於監管薄弱，蘊藏風險不低。阿爺正逐步收緊對影子銀行的監管，但考慮對市場的衝擊，又唔可以一下子煞停影子銀行操作。
中資金融股昨日全線大跌，跌得最甘的內銀股係民行(1988)插5.3%，內保股係平保(2318)，跌4.2%，被點名的內銀股亦跌2%咁上下。雖然中資金融股係抵跌，但又唔係跌得太甘，或許市場見到中國審計署可以咁公開批評大國企，加強監督，都係一種進步。
長實拆售葵涌酒店雍澄軒交易爆鑊，由於證監會質疑雍澄軒房間的買賣安排構成一項集體投資計劃，要申請認可，質疑有關交易的合法性，長實最後決定取消交易，向買家付回訂金與利息。發生咁事情過去未有先例，不少買家已賺錢沽出，酒店房間可能已交易幾次，如今主體交易取消，其他衍生交易都要取消，問題係若中間有人轉手賺咗錢並且使晒，唔夠錢退畀下手買家又點算？
打壓樓市 資金亂竄
中環茶友睇到另一個角度，長實拆售酒店不成，將來好有機會將幾間酒店包成房產信託出售，?家房託有價有市，即使不如拆售房間咁高價，亦唔會衰得去邊，所以唔使同長實擔心，即使當中要賠畀買家，都只是小數目而已。
我就話?家政府打擊炒樓，將印花稅加成倍，令過去買樓收租的投資者(不是短炒的投機者)無所適從，買樓少少哋都畀4、5%印花稅，2000幾萬以上大碼樓要畀8.5%，真係一簽字唔見咗一兩年租，三年內賣住宅仲要畀額外印花稅，買樓收租好似好傻咁樣，令過去做呢件事的人，焗住轉去做其他嘢，例如買房產基金，所以領匯(823)真係沿一條好靚的上升軌係咁升，其他如越秀房託(405)近日都突然抽上創新高。
問題係買房託始終唔同買樓，買樓自己操控單位生殺權，買房託由有管理權的主要股東定生死，如果主要股東不斷發基金單位買嘢，單位價值可能攤薄，加上房託愈來愈貴，真係有錢買乜嘢都好頭痕。
陸羽仁
上一頁 下一頁
金融High Tea 舊文