金融High Tea 2013年5月8日
金融High Tea——唔食牛扒改食雞
2013年5月8日
匯控(005)公佈今年首季業績，實際基準除稅前利潤為76億美元，較去年上升34%。首季股東回報率由去年同期的6.4%改善至14.9%，核心一級資本比率升至12.7% ，派息每股0.1美元。匯豐的美國的消費及按揭貸款組合有顯著改善，歐洲業務扭虧為盈。
匯控行政總裁歐智華表示，4月份業績與第一季業績走勢相符。中國內地經濟會加速，美國增長步伐會繼續優於同儕，歐羅區經濟將會萎縮，預期新興市場將有約5%增長。大笨象股價近期回勇，昨日微升0.15元至86.2元，已經係連漲9日，累積漲幅超過7%，昨日再在歐洲升3%左右。
匯控靠削出彩虹
匯控盈利靚仔，主要唔係生意做多咗，係賣咗唔賺錢生意同埋裁員所致，賺錢雖然係好，係呢條方程式唔好以長期玩落去，因為省錢有個限度，最後要生意增長接得上至得，否則盈利增長無以為繼。
今季美國公司公佈業績，好多都係上線營業額增長唔得，只靠減開支去增加盈利，妙就妙在唔止公司要減開支，連個人都要減開支，被美股交易員形容為「削支狂潮」。睇吓美國食品巨企泰森食品(Tyson Foods)剛公佈業績，季度營業額只有84.2億美元，比預期的85.8億為低，調低全年營業額預測。
泰森首季生意唔得，原來因為美國消費者嫌貴食少咗牛肉和豬肉，改為食較平的雞肉，泰森曾經加過牛肉和雞肉價，結果證明消費者對價格敏感，好多人轉去食相對平的雞肉，搞到泰森生意額唔到數。美股交易員就話，唔止消費者係咁，公司都係咁，個個都要減開支。
咁就有兩個啟示，第一係匯控只係做緊多數美國大公司做的同一件事，削開支增盈利，但咁嘅模式唔可以長期維持，所以唔好因為匯控季度盈利大升覺得佢好好景可以上番110、120元，佢長期得唔得始終要睇上線營業額有無可觀上升。第二，唔好俾長期分析影響咗短期炒作，長期未必掂，唔否定短期可以炒，美股大勢仍然向上，匯控作為環球大銀行，玩法根本同美股、歐股一樣，削支削出彩虹，匯控跟美股走多過跟港股走，可以借住市場水多炒上。
航運股一個炒字
標普500指數創收市新高，股神話美股仍會好大向上空間。港股今次唔執輸嘞，恒指收市重上23000點，漲132點，收報23047點；中資股表現搶眼，國企指數升113點，報11115點，漲幅超過1%，大市成交567億元。
市升搵嘢炒，航運股顯著發力，中海集運(2866)公佈以6.83億美元，向造船廠現代重工業買船，優化船隊。中海集運淡市買船，令人憧憬佢認為航運業見底，中海集運股價抽升，收市急升10%，收報2.09元，其他航運股跟住郁，中國遠洋(1919)大升9%。
花旗發表報告唔係咁睇好中海集運買船，話雖然買大型船舶可助降低燃油單位成本，但關注中海集運持續的大型定單將減慢供需關係復甦，維持「沽售」評級，目標價只1.61元。我就咁睇，歐美國家進口未見大升， 經濟復甦亦慢，睇唔到航運業咁快見底，目前只是炒作，唔好信晒復甦論，睇住嚟炒先至好。
陸羽仁
上一頁 下一頁
金融High Tea 舊文