金融High Tea 2013年6月17日
金融High Tea——頁岩股隨時爆
2013年6月17日
港股上周五反彈無乜力水，一度升277點，但結果只係升82點，令人擔心呢一浪下行仲未完，無咁快可以開展較似樣的反彈。
唔知你覺唔覺近排金融市場好亂，除了港股大跌之外，新興市場股市皆大插，貨幣又跌，理論上這一切都源於對美國聯儲局將收水的揣測，但美國收水，減少印銀紙，美元應該升，何解美元仲要跌，相反歐羅、日圓兌美元都大幅反彈，歐羅由1.28低位大幅反彈到家1.3346，日圓由103.7圓低位反彈到94.08，因乜事美國減印銀紙，美元不升反跌？
中環茶友話，呢一切亂籠嘢有一個源頭，就係大量借咗低息美元到處炒作的炒友，一聽聞美國可能收水，怕未來美息要大升，水源緊張，急急忙忙去拆倉，大量減縮各類風險投資，搞到一眾炒作盤全部要埋單，例如沽歐羅啦、沽日圓買日股啦、炒新興市場股票啦，全部要平倉，搞到呢啲過去熱門投資市場大反轉，而且一郁之後，價位跳升，觸發大量平倉盤，一發不可收拾，情況有少少似去槓桿化的狀況。亞洲市場不是香港跌得最慘，反而係呢兩年表現最好的印尼市場，佢地除咗股市大跌外，印尼盾亦跌到近年低位，搞到印尼央行要加息0.25厘支持匯價，可見外國資金正急促流走。
拆倉潮起 蟲仔亂竄
茶友形容，金融市場大亂源於拆倉，好似去掀開一塊大石頭，裏面各種類型的蟲仔標晒出來，四方八面咁走，好似無乜方向，但原因只因為你去掀開塊石頭。
我就話美國咁搞真係幾得人驚，家只係講緊，聯儲局可能在今個星期的會議，暗示往後幾次會議中可能決定收細每月買債的規模，只是「可能會」、只是減少每月買850億美元的量，不是停止買債，更不是要反過來沽出手頭上的債。好似食飯時只係上吓前菜，已經有咁大效應，若美國經濟咁幸運不斷好轉，聯儲局一步步做上述的收水行為，食到主菜，即係要大量沽債出街兼加息時，真不敢想像市場有多大反應。我估全面大拆倉時，所有貴價資產都會遭殃。
寫到呢度啱啱有加拿大朋友打電話問我，可以在香港買樓未？呢個朋友去年10月在政府推出雙倍印花稅打擊樓市之前，沽咗太古城單位，套現700幾萬，由於佢哋移咗民去加拿大，今年用600萬在加拿大買咗屋，家見香港樓價回番少少，就問我好唔好在香港買樓？我聽完「吓」咗一聲，我話「你啱啱去年先沽，做乜家又買？」，佢話「買來收租」，顯然係有不少現金在手想投資。我話「家香港實行咗雙倍印花稅，買間樓閒閒哋畀6、7%印花稅，加埋經紀佣1%，未見官先唔見8%，若只收得2厘租，即係一買樓就要將4年租畀晒政府，你買乜樓嚟收租啫？邊有租收？」佢話「唔通啲錢放在銀行存定期？」我話「可以一部份等低位買吓大股，博佢一年升10%、20%就沽，另一部份怕風險真係存港元定期都得，我見到銀行推廣定期有1厘息，你買樓畀完印花稅等如4年無息收，定期4年夾埋有4厘息，唔失禮喎。」
高價買樓 錯為收息
雖然我自己唔存定期，只係低位買高位賣吓大股，但呢個朋友深受高通脹概念影響，以為高通脹必定要投資，又唔想花精神研究，好想買樓收租抗通脹一了百了，佢唔知道在呢個時勢，買乜貴嘢都有問題，樓都係其中一種好貴的資產啦。而且佢沽一間700幾萬香港樓，先買一間600萬加拿大樓，若再買一間600、700萬香港樓，咁咪即係在高位買咗雙倍樓？唔好覺得兩地樓市不同，相同的是過去幾年都升咗好多喎。
小心貴嘢，係我的基本觀念，對一切貴嘢都要小心，貴嘢或者會升埋最後一浸，但呢啲刀口舔血的事情唔好預我啦。講話要避開貴貨，股票基本上唔算貴，但個別亦有升好多的股票，收息股、房託係一類，熱炒股份係另一類，記住「甚麼升高，就有可能跌低」呀，只要資金鏈一接唔上，就會爆煲。
最近同一個能源界的朋友傾起早前喪升的頁岩氣股，很有啟發。我問「你係能源專家，近半年炒頁岩氣股，你有無執到啲呀？」佢話「唔好提啦，愈熟情況愈唔敢炒，隻宏華(196)1.8元時我買過，一升到2個幾急急腳走啦，點知佢會喪升到4.25元。」佢講起來時仍面現揼心的神色。
但朋友其實對內地頁岩氣股相當唔睇好，佢話第一係呢啲股份基本因素根本唔得，第二國家亦無大量補貼政策，所以早前炒升之不過係齋炒而已。佢解釋人哋美國大量開採頁岩氣，係因為有技術突破，美國掌握了水力壓裂法和水平鑽井法，將極難開採的頁岩氣開採出來，目前還未看到中國油氣企業全面掌握到美國先進技術，即使中石油(857)、中海油(883)和中石化(386)三大巨頭都未得，遑論其他二打六公司啦。
既無技術 又無補貼
佢話更大問題係當大家以為阿爺會大力補貼頁岩氣開採時，點知乜都無。過去幾年太陽能、風電等新能源，就係因為有國家大量補貼，所以大量項目上馬，可知無錢難起動。但補貼多自然油水多，部份項目不顧效益，胡亂上馬，搞到產能過剩。阿爺受到教訓，新一屆政府話就話鼓勵開採頁岩氣，但見唔到有政策跟尾。最近國稅總局宣佈，從事頁岩氣生產及為頁岩氣生產性提供勞動服務的企業，繳納的增值稅稅率與開發石油、天然氣一樣同為17%，7月開始實施。連稅務優惠都無，在內地搞新嘢無補貼，真係做鬼都唔靈啦。
技術未到，補貼未來，內地開採頁岩氣的熱情開始冷卻，近期頁岩氣股下挫，便和內地延遲推出第三批頁岩氣探礦權有關。據國土資源部頁岩氣室主任包書景日前在第五屆中國非常規油氣大會上透露，原本計劃於今年下半年時推出第三輪頁岩氣探礦權招標，將會進一步延遲，極有可能不在今年推出。外界猜測推遲第三輪招標和首兩輪招標頁岩氣開採不順利有關。上兩次中標企業開採有困難，故對新開發區塊欠缺積極性，頁岩氣的熱潮不再。發改委能源研究所經濟中心副主任姜鑫民更指，部份首兩輪中標企業已萌生退意。
聽完朋友講，睇埋內地第三輪頁岩氣延期推出的新聞，我覺得頁岩氣股炒到咁貴，好多公司同少少頁岩氣概念沾上邊就炒到飛起，並無基本因素支持，唔知佢地何時何日可以做頁岩氣生意賺到錢。若果頁岩氣開發權真係咁寶貴，有意者去同首兩輪中標做唔掂的公司洽談接手即可，隨時話做就做。至於想做頁岩氣工程或者賣機器的公司，根本不掌握核心技術，頁岩氣開採無期，有何生意？如此看來，如今炒到飛街的頁岩氣概念股，最後90%無乜頁岩氣生意會成功，有好大爆泡風險。
上周五大市反彈，個別頁岩氣股照跌，宏華大插8.3%、巨濤海洋石油(3303)跌4.1%、安東(3337)就反彈1.9%，股價弱勢。有時炒呢啲股，太理性上唔到車，太冷靜亦唔識落車。乜都計清楚數，唔會敢去炒，所以炒股本來就有一定盲目性，但識盲目炒股，也要識硬性落車，好似頁岩氣股呢類股份，而家內地都要延推項目，敗象已呈，股價又跌破咗上升軌，真係唔走就笨。
假如我係操控頁岩氣股的大戶，就要睇我手上貨多唔多，如果大部份貨已派晒出街，咁就關人個閘，由得隻股自由行，股價變「自由落體」直插的機會好大。但如果大戶手上貨仍多未派夠貨，等啲股跌番咁上下後，又會大力炒高一浸，造成反彈兼向上的假象，人受記憶影響，散戶見過過去的高位，見到又熱閙番，又開心番埋嚟，以為佢又要破位向上，大戶借一個小炒浪，就把大量貨派埋畀散戶，到再突然急跌時成交量大升時，可能引到博撈底的散戶入場，大戶一次就把手上餘貨出清。
唔好以為炒股同大市無關，大市熱時，炒股可以輪住炒，無咁快散。但而家呢啲缺水市，資金外流，氣氛特差，即使上大炒都無咁易搵到散戶落疊，所以莊家都係落雨收柴，套取現金為主。散戶手頭上有貴價炒股者，趁佢未跌得多，走得要走啦，唔小心處理手上的貴價炒股，今日唔走，過幾日更平更唔想走，一個大浪走唔切，好易就變千年蟹貨架啦。
陸羽仁
上一頁 下一頁
金融High Tea 舊文