金融High Tea 2013年6月21日
金融High Tea——揸着隻蟹鉗
2013年6月21日
美國聯儲局主席伯南克終於開大，唔係含含糊糊，而係具體拋出量化寬鬆(QE)的退市藍圖，指出若美國經濟持續改善，會於今年下旬開始「收水」減少買債，至明年中完全終止QE。儘管市場對此已有相當心理準備，大市仍然難逃一跌，但估唔到港股會跌得咁醜樣。
恒指昨日由頭跌到尾，一開市已跌318點，好友仲想等佢反彈，點知已係全日最高位，之後一直跌，收市勁跌604點，國企指數仲弱，跌超過3%，熊霸中、日、韓股市！
聽經紀張講，昨日玩短炒的散戶無有識死，見期指跌到20500點，就走去揸，預50點打靶，點知轉眼就打靶，再跌到20400點，又揸，點知又插，又打靶。散戶的心態係都跌咗咁多啦，應該反彈啦，點知成日都無彈過，差不多所有時段入去揸貨都只係揸着隻蟹鉗，鉗到隻手流晒血，搞到收市前即日鮮好友全部打晒靶。
內地水緊A股濕滯
港股咁弱係美中兩大因素的綜合反映。聯儲局主席伯南克好清楚咁講今明退市的藍圖，按道理列出清晰的前景，可以減少市場的不確定性，有利市場反彈。但睇番美股自2009年開始的走勢，每次開始QE就開展一個升浪，結束QE令個市回吐橫行，雖然話伯南克畀咗退市藍圖的確係清晰咗，但只可以令股市在超賣後反彈，不能帶來大市再穩步向上的動力，可以假設美股未來對港股的影響只是中性偏淡。
另一個負面因素是內地，上證綜合指數跌2.8%，A股除了受美國可能「收水」的消息打擊外，昨日公佈的經濟數據亦非常差，銀行又水緊。匯豐公佈中國6月製造業採購經理指數(PMI)預覽值降至48.3，創了九個月最低水平，其中新出口定單指數預覽值為47.1，創了十個月最低水平，顯示製造業前景繼續惡化，數據出街後，澳元兌美元匯率快速走低，刷新三十三個月低點的0.9238。
內地水緊的情況漸趨嚴重，上海銀行同業拆息都升上10厘以上高位，聞說四大行都要撲水，今次央行態度強硬，見市場水緊都不施援，據講央行在半年結前想逼銀行清理地方債和影子銀行，又逼銀行收回房地產貸款，以壓制樓價上升。雖然我唔係幾驚內地金融體系爆煲，不過若央行有心和銀行鬥法，未來仲要捱一陣子，A股都無運行。
內地鬧錢荒，貸款需求延伸至香港，本地銀行推高存款利息搶資金，中銀香港(2388)和渣打(2888)等大型銀行，已上調港元定存息至1.5厘吸納短錢。
買貨莫急分段低吸
咁樣就變成外圍和本地利息齊升，首當其衝的自然係對息口敏感的地產股及收租股，本地四大發商無一倖免。內地資本市場尤其缺水，內房股跌得更慘，龍頭股中海外(688)及潤置(1109)齊齊重創超過6%！內銀股跌得悽慘，民行(1988)跌幅領先，勁插超過6%，建行(939)及重農行(3618)排第二，齊插超過半成！
恒指去年低位18000點，家20400點，距低位仲有12％，但你睇國指就跌得甘啲啦，距去年低位只有6％左右，個別紅色股更跌近去年低位。好多讀者問我可唔可以開始買股，我估大市短線仲有得跌，股票唔跌近去年低位唔好買，想買跌得較多的股票，現在都只宜只先買一注，留番啲彈藥等佢跌深啲時，才買第二注、第三注，唔好太心急呀。
陸羽仁
上一頁 下一頁
金融High Tea 舊文