金融High Tea 2013年6月25日
金融High Tea——李市唔好玩
2013年6月25日
內地上證綜指大瀉逾5.3%創近四十六個月最大跌幅，跌到1963點，一Q就跌穿2000點，返番一字頭，拖住港股向下，最後港股跌449點，跌幅2.2%，收市得番19813點，再創今年新低。
既然港股跌市主要由內地帶動，唔可以唔講吓內地跌乜。我早前都講過，美國聯儲局收水前景落實後，更大風險反而係中國經濟放慢及收水，呢件事終於發生，內地股市在上周四起三個交易日共跌8.4%，愈插愈急，昨日更是勁插，好似國家跳水選手咁高台插水無見水花。
斷奶夾倉官銀鬥法
內地呢次跌市源於銀行水緊到處搶錢，市面人心惶惶。早至半個月前，市傳光大銀行因為頭寸緊張，搞到要向四大行要求支援，事後兩家銀行負責人出面闢謠。到上周四上午，市場上爆出央行向四大行其中一家注資500億元，另一國有銀行由於流動性緊張發生資金違約等諸多傳聞，銀行同業拆借市場被逼延遲半小時收市，引發金融市場「大地震」，當日的隔夜拆借利率突然瘋漲至13.44厘，盤中最高成交利率竟然高達30厘，已有燶味。
過去幾年，商業銀行習慣了央行在市場資金緊缺時會出手相助。但央行今次面對市場出特大「錢荒」，市場拆息無咁高時，卻無乜動靜，不但冇「補水」，反而在當天繼續發行20億元央票抽水，直情可以話係「斷奶」，令市場擔憂情緒瞬間飆升。
英國《金融時報》話中國央行夾倉，個別銀行之所以出現融資問題，主要是過度依賴在銀行間拆借短期資金，而且放貸規模超出了監管機構限制。在上任總理溫家寶的年代，市場一唔夠水政府就放水，但今次「李克強經濟學」正在發威，新總理李克強正在發動一場「可控的金融危機」。
股市投資者當然喜歡「溫市」多過「李市」，溫總將問題掃入地氈底，李總就玩踢爆，李市唔易炒。內地金融界耳語，周一上海銀行同業隔夜拆息其實已回落到6.489厘，但股市不但無因拆息回落企番穩，仲要急跌，除咗話市場恐慌外，銀行又會唔會在半年結前搞冧股市逼政府鬆番少少手呢？一場官家和銀行鬥法的好戲正在上演中。
跌唔跟足反彈乏力
在昨日內地A股市場，銀行股全線暴跌，不止傳聞主角興業銀行、民生銀行及平安銀行三家一齊跌到10%的停板位置。港股以內銀股及內房股是跌市元兇。恒生中國H股金融行業指數勁跌3.4%！民生銀行H股(1988)挫8%，是表現最差內銀股，其次係招行(3968)及重農行(3618)，齊跌超過4.5%。
內房股龍頭股靠穩，恒大(3333)甚至逆市升1%，但板塊內多隻股票跌勢慘烈，當中碧桂園(2007)及保利置業(119)跌半成，富力地產(2777)插9%，恒力商業地產(169)跌14%！不過都係因為升得多才跌得多，因為早前內地萬達入股恒力令佢急升十幾倍，只係嘔番少少出來而已。
昨日港股走勢好差，再穿低位，不過跌幅係2.2%，叫做少過內地的5.3%跌幅，下午3點內地收市後港股反彈唔多，夜市期指到黃昏時仍再跌多140點，顯示市底仍弱，欲彈乏力。
後市先要睇內地，過去股市一跌領導人會出好多招救市，但李克強主政係唔係咁耐無人知，內地股市平添一層新人事的風險。
陸羽仁
上一頁 下一頁
金融High Tea 舊文