金融High Tea 2013年7月17日
金融High Tea——中國移動網絡大戰
2013年7月17日
港股牛皮待變，內地上證綜指昨日升0.3％，港股無大上落，收市升9點，即係0.1％都遠遠未夠。港股每逢踏入月尾的那個星期較波動，估計港股下周開始可以走出大方向。
高盛名單加入聯想
美資大行高盛更新了它們以「由上而下」方法選股的亞太區股份組合名單，高盛短線仍睇淡亞洲市場，認為短期增長及復甦都會落後於美國，市場仍然憂慮美國聯儲局退市，以及內地經濟增長放慢及流動性趨緊的問題，為整體亞洲股市前景帶來不確定性。
高盛執過它的亞太區愛股名單，最新把聯想(992)、韓國的現代汽車，以及台灣的鴻海精密加入在該亞太區名單內，另把澳洲的Metcash及菲律賓的BDO Unibank剔除。亞太區股市今年表現唔好，期內MSCI(除日本)指數跌5.6%，高盛愛股組合微微跑贏大市，今年初至今只跌3.6%。高盛亞太組組合換馬後的港股包括建行(939)、騰訊(700)、聯想、匯控(005)、中銀香港(2388)及友邦(1299)。
在智能手機興起後，全球個人電腦銷售大幅放緩，但聯想有個中國市場照住，銷量叫做頂得吓，最近仲過埋惠普，成為全球個人電腦銷售一哥，高盛咁睇得起聯想，佢昨日股價亦只是升0.6%贈吓興。
高盛組合中最省鏡係隻騰訊，佢昨日再大升，一度見高位332.6元，收329.8元，仍有2.6%升幅進帳，強股即係強股，騰訊係少量經過6月25日大跌後，如今再創新高的股份，大跌日騰訊低位269.4元，若當日咁夠薑低位買咗騰訊，到昨日收市已有22.4%升幅。當然都要睇你撈乜股，若當日撈着隻中建材(3323)，到今日都無乜着數。
網龍賣仔 券商睇淡
科網股係炒得癲，但都有實質併購活動支持，昨日網龍(00777) 就宣佈以10.9億美元(約84.6億港元)，向百度出售其持有91無綫網絡的57.1%股權，市值97億的網龍賣仔套現85億，當然睇到人嘩一聲，驚歎科網有價，但網龍股價大插21.2%收19.04元，顯示市場唔睇好網龍呢個賣仔行動。
內地搜索引擎巨頭百度願意用總價19億美元去收購91無綫網絡，主要睇上佢的移動應用程式商店。內地現有3億智能手機用戶，而且數目還在急促增長中，91無綫擁有熱門應用商店HiMarket，備受市場看好。雖然谷歌(Google)的安卓(Android)移動操作軟件目前在中國是最受歡迎的的軟件，但谷歌自己的Google Play應用商店經常被指不穩定，主要因為它的伺服器在香港，所以空出應用商店市場畀HiMarket去玩。
如今內地幾大科網巨頭正混戰移動互聯的世界，騰訊正通過受歡迎的微信(WeChat)提供應用、遊戲分銷服務來增加收入；阿里巴巴近幾個月大力投資在移動互聯領域，以確保對智能手機用戶的影響力； 所以百度亦出重手買91無綫，和自己的搜索引擎結合攻打移動互聯的世界。
網龍一直對外宣稱，想將91無綫分拆上市，如今突然賣掉，令人錯愕。網龍在4月股價仍然只得9元左右，炒到本周一的24.6元高位，3個月升近2倍，就係炒分拆91無綫的概念。91無綫去年純利787.7萬元人民幣，收購作價達市盈率的1480倍。網龍管理層昨日在投資者會議上解釋出售91的原因，是由於作價理想，甚至較上市獲得更多的資金，並強調分拆上市進度良好，只是在審查的過程中遇上百度的建議。不過證券界不看好，國泰君安向投資者發出電郵表示，話網龍將出售公司的寶貴資產，會從研究名單中將網龍剔出。
我都好同情網龍管理層，移動互聯世界千變萬化，點保證最後可以賺84億走，現實啲睇咁高價唔賣有啲笨。不過換一個投資者的角度，網龍賣仔後剩下的業務如網上遊戲並無甚麼旗艦遊戲，令人覺得佢將寶貝賣掉。這個故事說明，股市是賣夢的地方，無夢可發，真係濕滯，網龍原有現金約21.8億港元，加上賣91的84.6億，合共有106億，如今市值只有97億，未來現金多過市值，問題係買家現金公司做乜。
陸羽仁
上一頁 下一頁
金融High Tea 舊文