金融High Tea 2013年7月3日
金融High Tea——阿伯唔使死
2013年7月3日
昨日假後股市重開，一早就在期指市場演出一幕殺人事件。話說期指早上9點15分開市後，初頭仲正正常常，到9點21分就發癲，短短幾分鐘就由20755點，急促抽上21022點，大升267點，一支大陽燭咁升上去，嚇到揸咗期指淡倉的散戶魂飛魄散，走都走唔切。
妙就妙在期指抽完一棍後，就一直跌，跌到10點10分跌番到20620點的低位，一個鐘頭唔夠跌番402點，跌到突晒，期指大戶表現一招殺完淡倉殺好倉。經紀張的講法最好笑，昨天市況太快，後生仔反應快，做咗淡倉一升就打靶，或者升上高位追揸，真係幾分鐘內完成。如果似佢咁雖然一開市沽咗張期指，見個市抽升手忙腳亂，四圍按機看看有甚麼事發生，睇得嚟發覺唔到有乜事，已經過咗10分鐘，期指已由高位回番200點，好似無升過一樣，跟住仲倒頭跌，經紀張話呢啲咁快速市況，阿伯反應慢，唔做嘢，反而唔使死喎。
四百多點 上下飄移
我話呢啲擺明係博亂市，現貨未開，只有期指，假期過後，散戶有啲頭暈暈未有方向，大戶真係掃1000張期指就掃高個市，放低1、2億期指按金已經可以呼風喚雨。
最後大市跌144點，收20658點，跌幅未算大，但不同類別股份受消息影響，上落好大。阿爺日前宣佈將於下周三起，上調非民用天然氣零售價格到站價(即批發價)每立方米0.26元至1.95元人民幣。目前，內地石油企業有中石油(857)中海油(883)及中石化(386)三巨頭，中石油壟斷內地天然氣行業，成為此次調價的最大受益者。
不過，即使加咗價，中石油仍然做緊上游入氣的蝕本生意。目前中石油從中亞進口天然氣到達國內霍爾木茲口岸的完稅價格已經係每立方米2.02元，西氣東輸二線平均輸配費用1.1元，中石油每立方米虧損0.88元。話得說回來，中石油賣氣本來一直蝕緊，如今提升批發價，蝕少咗，都對業績都有利。
來貨價加 燃氣股弱
美銀美林認為，氣價改革將可減少虧損，對上游企業影響正面，中石化及中石油會係最大的受惠者，但提價會對銷氣量產生負面作用，預料今年全國的燃氣銷量增長將會較預期及過去年代增長為慢。另一方面，北京控股(392)、煤氣(003)、中海化學(3983)目標價都要調低。大摩認為調高天然氣價格，對中石油股價正面，將投資評級上調至「增持」。
股價反映晒市場睇法，中石油及中石化昨日交投急增，成交佔大市全日成交5%。中石油逆市大升6.7%至8.8元。不過，中石化表現就唔係咁靚仔，股價跌2.4%收5.33元。燃氣股反艇，昆侖能源(135)加埋氣田維修的負面影響，股價大跌6%、華潤燃氣(1193)跌5%、港華燃氣(1083)跌4%。睇番啲燃氣股，近半年都係表現較強的股份，主要原因係市場預期佢哋未來仍有高增長，若批發氣價上升令需求增長顯著放慢，就無法支持20幾倍的高市盈率，所以加價實施後，要睇實佢哋生意有無慢，先知係人係鬼，總括來說，佢哋有少少位高勢危。
陸羽仁
上一頁 下一頁
金融High Tea 舊文