金融High Tea 2013年7月9日
金融High Tea——樓市入秋風霜冷
2013年7月9日
美國就業市場好過預期，令投資者對聯儲局提早收水預期升溫。美股掂港股唔掂，皆因美國係經濟好收水，而港股係經濟麻麻仲要收水。港股繼續唔衰唔跟，跟住內地A股直插，上證綜指傳快將重啟新股上市，收市大跌2.4%，再度失守2000點，收1958點。恒指朝早最多跌超過600點，認真濕滯，午後叫做跌幅大量收窄，仍插272點，收20582點，大市成交只有524億元。
中環茶友話，暫時港股仲係一個上落格局，今個星期可能都未有大方向，但下星期步入下半個月，加上聯儲局又開會，就會走出一個方向來。
周日地產經紀發動遊行，號稱兩萬人參加，睇落最少有幾千，都可以話罕見咁團結，可見政府的三辣招，真係打到地產代理業入肉，樓價未大跌，但成交勁插，靠成交食飯的經紀真係無運行。
雖然地產經紀遊行好似無太多人同情，但我就比較同情啲夥計。經紀仔食佣維生，而平日少少地都賺萬幾、兩萬，而家開唔到單得番底薪幾千，若然一家大細真係唔夠錢開飯，食一兩個月穀種仲得，捱半年以上開始頂唔順。但我唔同情啲地產代理老闆，平時講到大仁大義，但一落雨就收遮，有老闆聲言再咁落去要大量將分行關門，有經紀仔同我講，佢哋而家賺幾千蚊個月根本頂唔順，遲早要轉行，不過聽到老闆接受訪問話要將部份分店結業，佢個後尾枕就涼咗半截，我都未搵到工轉行，唔係幾千蚊一個月都唔想畀我呀？上市嗰間代理公司都話要同小股東交代吖，經紀仔打工嗰間並不是上市公司，毋須向小股東交代，照計唔使做到咁絕。
發展商等執平貨
我話香港正值炎夏，但樓市已經入秋，正受三辣招及加息陰影雙重打擊，所以地產股上周五炒咗一日新界東北概念，昨日都回番晒，你睇隻信置(083)，昨日跌3.2%，遠高過大市的1.3%跌幅，跌到10.22元，轉眼間回番到接近6月24日的今年低位10.02元，隨時破位向下咁格。聽聞信置老闆都幾睇淡個市，以往佢哋好勇進咁投地，呢排根本未見佢哋拍到或中標乜嘢大幅地皮，策略係忍住手，等執平貨。
樓市唔掂，代理股唔掂，連帶銀行的按揭業務都大受影響，樓按一哥中銀香港(2388)再減與港元同業拆息掛鈎按揭(H按)利息，新H按息率低至港元拆息加1.7厘，若以一個月拆息0.21厘計，實際息率只是1.91厘，鎖息上限亦低至P減2.85厘，即2.15厘。樓按乃銀行主要業務，樓按大減，本地銀行盈利亦有壓力。
德銀睇好電力股
大市跌咗唔少，證券商開始逐個行業尋寶，有外資就睇中近日回落不少的內地電力股。內地電股本來因為煤價不斷跌成本大降，本來好好景，但煤價跌得太多減電費勢在必行，令電力股股價自5月下旬至今累跌11%至29%。德銀日前估計減電費將於9月實施，加上秦皇島煤炭價格已跌至低於每噸600元人民幣的水平，發電行業行不明朗因素，幾近消除，對電力股股價有正面支持。
德銀計及電費減2%及跌幅更大的煤價及火力發電量幾項假設，德銀上調今明兩年電力股盈利預測5%，較市場共識高10%；另外，德銀預測內地今年能源消耗量增長由6.9%下調至6%，料明年增長將隨經濟復甦而加快至7.5%。
德銀重申華能(902)、潤電(836)、大唐(991)、華電國際(1071)及中國電力(2380)「買入」評級，當中以華電國際及中國電力為首選。目標價分別由4.4元及3.6元，上調至4.9元及4元。電力股昨日個別發展，被德銀睇好的兩隻電力股亦各走極端，華電國際逆市升0.3%，收3.39元，中國電力跌3.2%至2.75元。大唐發電、龍源電力(916)造好，升2.4%及3.2%。表現最好的是華電福新(816)，有美銀美林唱好，指水電電價上調有利華電福新純利提升，預料華電福新上半年因此獲利約8億人仔。維持「買入」評級，華電福新股價逆市勁升6.5%至2.3元。睇嚟市場都想搵啲電力股炒炒。
陸羽仁
上一頁 下一頁
金融High Tea 舊文