金融High Tea 2013年8月30日
金融High Tea——交到功課免留堂
2013年8月30日
期指結算日港股無大動靜，據期指老手所講，結算日指數若有大變動，證明大戶有重倉想平倉，下個月多數會走向相反方向，例如結算日大升，即係話大戶做咗好倉要平，平完好倉下個月由佢插。但結算日平淡，表示大戶只係將倉位轉下個月，並未平倉，昨日就好似係咁。
港股昨早跟隨歐美股市反彈，中午一度受內地A股回軟拖累，午後在金融及地產股拉動下發力再上，恒指收市漲180點，報21704點；國企指數升85點，報9850點，大市成交507億元。
內銀股及兩地地產股係推動大市上升主力。工行(1398)昨日公佈業績，成績唔錯，都係市場預期上限。工行股價靠穩，微升0.2%。至於日前公佈業績的農行(1288)，則受多家大行睇好，其中高盛、德銀、花旗及美銀美林評級「買入」，大摩評級「增持」。
內銀績佳 暫時減壓
有分析指8月中國新增信貸，預計可能維持在6500億元人民幣，少過7月份，內銀股仍然未係好好景。我就話世界總有不完美，由於內地經濟下行壓力真係不輕，西方亦都睇得好淡，好怕內銀爆出大量壞帳，而家內銀雖然未全部公佈晒業績，但出咗一半，隻隻都有十幾巴仙增長，爛帳仲未失控(或者成功收埋咗)，咁叫做交到功課免留堂啦，大家唔好太多要求。
但你問我就對內銀點睇，我睇淡過以前少少，差別在於以前可以好長線睇好，而家只係階段性睇好，唔敢講內銀十年後得唔得，但跌得多時買吓走一轉唔拘。
這裏涉及另一類股如中石油(857)或昆侖能源(135)，我點解話見佢跌咁多可以分段買吓，其實我都係同內銀比較，論穩陣，大跌後的中石油其實都幾穩，中石油市盈率10.7倍，息率4.2厘，比起工行的6倍市盈率、6厘息率，雖然中石油仲貴少少，但有4.2厘息收，即使業務無乜增長，收吓息都好。
昆侖反彈 可入長揸
如今昆侖老總俾人拉咗，部份證券商如大摩和花旗將昆侖降級，原因都係「難以量化事件影響」。如果民企創辦人俾人拉咗可以是滅頂之災，國企老總本來就是幾年一換，而且同佢做生意的人都係睇住個官家招牌，又唔覺得拉個老總影響咁大。
昨日中石油股價升1.8%收8.42元，昆侖股價反彈2.6%到11.16元，暫時企番穩少少，但都未敢話佢哋已經跌定。
有人問我昨日話可以分注買昆侖係投機定投資，我答話係投資，因為呢啲燃氣股等如公用事業，昆侖這類公司從來都可以買，問題是股價較貴，但佢急跌落來，股價大平賣，做乜唔買吓？而且買咗都唔係炒兩個月博佢反彈一成就走，而係低位入想長揸。煤氣(003)22.3倍市盈率都有人買來長揸，做同類生意的新奧能源(2688)現價都要22.1倍市盈率，昆侖13.4倍市盈率做乜唔買？若然未買者，都唔使分太多注，分兩注，現價買一注，再跌到10元買一注，若然只買到一注，將來候機再買。
陸羽仁
上一頁 下一頁
金融High Tea 舊文