金融High Tea 2013年9月10日
金融High Tea——虎頭蛇尾
2013年9月10日
內地有利好股市的經濟數據及政策連續出台，加上總理李克強接受英國《金融時報》訪問，話會致力維持中國經濟長期健康發展，推動A股暴漲，上證綜指抽升3.4%，上深兩市總成交突破3100億元人仔！
內地8月出口按年增長7.2%；貿易順差擴大8.3%，兩者都高於市場預期。8月份全國居民消費價格指數(CPI)較去年漲2.6%，創了三個月新低。貿易數據強勁，通脹唔高，中央有更多空間推出政策改善經濟。
政策方面，繼上海「自由貿易區」試點後，《每日經濟新聞》報道，中央對民間投資的相關政策會更加寬鬆，凡市場機制能有效調節的事項，不再設定行政審批。與此同時，國務院已經表示會盡快在金融、石油、電力、鐵路、電訊、資源開發、公用事業等領域向民間資本推出一批符合產業導向、有利於轉型升級的項目。
民行內地升停板
金融方面，市傳有關內銀股發行優先股的細則或於今年內出台，以提升內銀股的資本充足率。市場認為消息對內銀股再融資的憂慮緩和。內地銀行股昨日全線爆升。民生銀行將會成發行優先股試點，股價一度漲停板。民行H股(1988)，勁升6%至9.25元，係升幅最高的國企指數成份股。
A股暴漲，港股連續第四日炒上，不過走勢就有點虎頭蛇尾，朝早最高升超過230點，但收市升唔夠130點，收22751點，升幅只有0.6%，表現遠遠落後於國企指數升幅1.9%。大市成交增加至671億元。
騰訊(700)及銀娛(027)再度刷新上市最高紀錄。騰訊升至390.4元；銀娛漲至50.95元。騰訊上市九年，升幅超過一百倍，已經被視為股市神話。呢個神話已經被銀娛打破，從金融海嘯期間2008年底的0.5元一路炒上，五年之間暴漲超過100倍。「牛氣」有過之而無不及。
銀娛再創神話
有分析早已指出澳門係中國境內唯一合法經營賭場的城市，行業本身享有壟斷地位。另外，銀娛擁有大片土地儲備，使得多年來發展情況非常可觀。
萬達地產(169)夥拍大股東購入英國倫敦重建項目，涉及9300萬英鎊，萬達地產及萬達香港分別佔60%及40%權益。受消息刺激，萬達地產被追捧，今早一度升近一成。公司大股東被內地媒體選為首富，有人笑言呢啲係首富效應。
倫敦樓市係最國際化的市場，成為各地資金落腳點。有中環老友早前去完，話倫敦樓市好，因為中東佬、俄國佬、印度佬都去晒，?家仲多埋大陸佬，不過，升完一浸又一浸，?家倫敦樓價絕對唔比香港平，呢個時候走去買地起樓，係咪又真係咁好消息，可以支持股價升咁多呢？
高位買海外地產本應唔係咁着數，萬達地產咁有反應，從炒作角度睇，股價咁樣撩高，證明貨源仲係強者手，先至可以升得咁容易，但點解佢要炒上益街坊呢？一個直接解釋，係佢用香港上市公司嚟做融資平台，故必須造大造強股價。
過去大半年，好多內地有頭有面的房產商都嚟咗香港收購上市公司，咁做主要係貪香港融資易過內地好多，內房商認為內地調控唔易全面放鬆，若果搵到水喉提供資金，就可以大大減低融資成本，相信呢個先係真正炒作原因，散民跟風炒作呢類股份，最緊要知背後目的，係公司想搵水，而唔係俾小股民搵水！
陸羽仁
上一頁 下一頁
金融High Tea 舊文