金融High Tea 2013年9月6日
金融High Tea——棄港從滬
2013年9月6日
港股昨日升271點，大有衝高向上的趨勢，但惹起中環人談論的不是大市，反而是新地(016)以217.7億元人民幣奪得上海徐家匯中心項目地皮，成為新地王。新地在香港只用7.5億買元朗細地，卻動用217.7億人仔在上海攞大地，對比何其明顯。
自貿區人仔自由兌
今次上海攞出來拍賣的徐家匯中心地皮，佔地近10萬平方米，只有新地，九龍倉(004)及恒基地產(012)幾個香港財團參與競投。新地聯席主席郭炳江親自督師，只用了20分鐘，就由手持3號牌的新地代表以217.7億元人民幣投得地皮，較175億人民幣的底價高出兩成四，以總價計算，是中國新地王，但每平方米樓面地價3.73萬元人民幣，不算太高。 徐家匯中心項目屬於商業、餐飲及酒店用地，是上海最後一幅拍賣的黃金地段。
中環茶友第一個反應是新地棄港從滬，在上海落重注，要知道上海地價比香港便宜，新地投得呢塊新地王換成港元呎價約4700元一呎，仍然比香港黃金地段的商廈低，換言之呢塊地王在香港賣，要300、400億，加埋發展成本，等同一個500、600億大計劃的規模。
茶友歎道，新地好耐都無在港作咁大投資，自從公司高層陷身官司之後，好以對香港無乜興趣，例如以住過新年贊助在國金中心放煙花，呢兩年都無搞，在港投資只是細細注，反而在上海卻落重力出大注，有將投資轉去內地之嫌。
地產股炒反彈
唔止新地，長和系賣碼頭、賣百佳，都係出貨套現之舉。雖然有好多嘢涉及政治，但也有經營環境的問題，愈來愈多財團覺得香港唔好玩，要移去其他地方玩，你睇上海搞自由貿易區，華爾街日報報道自貿區內人民幣將自由兌換，若然係咁都好大動作，自然亦吸引投資。
雖然龍頭地產商改喺內地落重注，但近日新盤去到貨，地產股跟住個市都有不俗表現，有份賣樓的新世界(017)，旗下元朗新盤溱柏熱賣，累計總銷量335伙，佔該樓盤的74%，新世界股價造好，收報11.58元，升0.26元或2.3%；即將開售荃灣昇柏山的長實(001)，全日升1.4元，報113元，政府公佈房屋長期發展策略諮詢文件，十年建屋量合共47萬伙，其中私樓係兩萬伙，有人就話供應唔係咁多，樓價跌極有個譜，於是地產股又多個藉口炒反彈。
雖然私樓供應十年內未能大增，現屆政府打壓樓價肯定絕不手軟，若然樓價上升，恐怕辣招又會出籠，個市愈綁愈實。有人仲用陰謀理論，話長策話到起咁少樓，就係用恐慌戰術，嚇到環保佬、地區佬怕怕，唔敢再阻住政府搵地，呢啲叫做哀兵戰術。班高官有無咁醒，但初步效果確係有人開始講，話應該研究搵部份郊野公園地起樓，整個建議畀市民諗吓，唔好忘記份報告係諮詢文件，起樓數字日後仲可以改，如果個個都話兩萬個私樓唔夠，要起多啲，政府就大條道理做嘢，所以唔可以靠表面數字去睇。
陸羽仁
上一頁 下一頁
金融High Tea 舊文