陸羽仁 BLOG 2013年10月2日
停戰升市
2013/10/2 上午 09:40:46
網誌分類: 經濟
美國政治好煩，搞到政府關門，但影響到香港股市，又唔可以唔理。
一如所料，美國國會參衆兩院議員就總統奧巴馬總統的醫療法案「傾唔埋欄」，新年度預算案泡湯。美國政府多個部門「無錢使」，非緊急服務由昨日開始停止運作，數十萬公務員放無薪假期。
昨日係首個關門日，美股不跌反升，市場上講幾個理由，第一是美國製造業數據幾靚仔，9月的ISM製造業指數由上月的55.7點，升至56.2點，好過市場預期的55點，且創了兩年多以來新高。
第二個理由是見壞消息入貨，Cornerstone Wealth Management的首席投資官斯克倫卡(Alan Skrainka)表示，「好多人看到了市場與經濟狀況好轉，知道政府關門只是暫時性的，所以把它當做投資的機會。」
第三個理由也是相關的，分析家稱為「停戰升市」，昨日美國總統奧巴馬，眾議院議長博納等一眾「反阻頭阻勢派」無出來叫陣，在野共和黨人自然沒有還口，市場得到一時寧靜，大市就反彈。
睇股市恐懼指標VIX指數昨日朝早由高位回落約6%至最新的15.6，以及黃金價格不升反而大跌逾40美元至每安士1300美元以下，最新報1284美元，市場避險情緒唔高。
投資者對政府「停運」處之泰然，美股反彈。杜指收漲62點至15192點，漲幅0.4%；标普500指數仲勁，升13點至1695點，漲幅0.8%。
政府「局部」停運對經濟及金融市場的影響唔會好大，而且唔可能長期維持，一般停一至兩星期就逼出協議，因此市場樂觀派充斥，都當佢「無到」，認為係趁低吸納的機會。不過，有分析指出，兩黨現時出現的僵局可能會延續到未來幾個星期的美債上限調升的談判，而兩黨繼續「無偈傾」的話，玩出的火，就遠比政府部門停運來得危險，因為兩個難題都係同埋那一枱人去談判，要短期內傾掂兩件事，比傾一件事複雜得多。
對奕的局面好簡單，執政民主黨坐主位，佢過咗醫改法案，又執住政府大權，自然想原封不動執行。反對黨共和黨控制眾議院，好唔順俾政府行醫改，唔攞番少少嘢唔想走。而家奧巴馬賭政府關門，民怨針對共和黨，若債務上限不調高，市場衝擊大得多，賭共和黨頂唔頂。係唔咁呢? 俾奧巴馬順風順水，咁咪好易連任? 奧巴馬唔放番少少甜頭出來，共和黨似乎有賭落去的誘因。
美國財政部已經表示，10月17日前唔能夠上調現時16.7萬億美元的債務上限，美國政府可能在10月22日至31日期間無法支付所有的賬單，美國的信貸評級勢將遭下調。
前年8月，評級機構標準普爾就係因為兩黨玩得太過火，搣走了美國「三條煙」的最高信貸評級，搞到美國金融市場「一鑊粥」，但還記得此前提過的「梅菲定理」嗎？最怕無人預期的事件偏偏會發生，意外不可不防也。
陸羽仁
回應(8) 我想回應
陸羽仁 BLOG 舊文