陸羽仁 BLOG 2013年11月29日
炒到年頭
2013/11/29 9:22:29
網誌分類: 經濟
昨日係感恩節，美股休市一天，今日亦會提早三個小時收市。
今日，係美國人的「黑色星期五」。唔好搞錯，唔係13號星期五。而係感恩節後翌日，美國聖誕購物旺季開鑼的第一天。當日，全美各大零售商都做特大推廣，吸引消費者採購商品，好多店鋪於星期五淩晨已經開始營業。去年，全美國有超過2.47億名民眾在黑色星期五週末購物(包括實體和網上店鋪)，高過前年同期的2.26億人，為歷史新高，總消費金額達到591億美元，年增長12.8%，也創下新高。今年唔知點樣。
近年，加拿大零售商見美國「黑色星期五」零售咁火爆，為免生意被搶，亦推出名叫「白色星期五」(加拿大比較多雪)的類似瘋狂優惠日。
美國個人消費開支約佔國內生產總值的70%，是經濟增長的主要引擎及指標，消費者信心及支出在很大程度上決定了美國經濟的增長前景。而12月聖誕購物旺季的銷售額往往佔了全年消費額的四成以上，而「黑色星期五」又係位列全年銷售量最多的三天，另外兩天係聖誕前夕及Boxing Day.所以，全世界都十分注視今日的銷售情況。
照理說，美國今年失業數字好轉、房地產升溫、股市屢創新高，應該會提高消費者的信心。但反常地，美國10月份密歇根大學消費者信心指數降至今年以來的最低水準。正如瑞信紐交所操作主管Art Cashin早前指出，美國經濟出現了人格分裂的癥狀，在股市屢創新高的同時，好多人都搵唔到工作，好多分析對美國今年零售業唔係太樂觀。
有分析指出，由於美國失業率高企，消費力沒有改善，加上美國政府停運的打擊，消費信心唔高，梅西百貨、沃爾瑪、百思買等多數零售商零售商，都不惜犧牲利潤祭出更大的優惠活動以吸引顧客上門。事實上，許多零售商普遍下調本季的獲利預期。
除了消費者信心及能力大不如前，實體店零售商亦受到日漸盛行的網上購物衝擊。嚟緊嘅星期一，號稱「網購星期一」，係美國全年最最火爆的網購日。美國福瑞斯特研究公司近日發佈了《2013美國假期網路銷售狀況預測報告》，預計今年年底購物季(11月至12月)，網上銷售額增速有望達到兩位數，銷售額將突破780億美元，連續第三年實現增長。多了人在網上購物，就少了人去實體店，生意就更難做啦！
如果上述觀察係啱，美國目前只有「少就業復甦」，在大放水的情況下，股市好，就業唔好，咁聯儲局亦好難戒毒收水，港股就繼續玩上落(除非中國大好，表面睇唔太似)，有貨在手，揸到明年頭上高位都要走一走。但美國明年一二季似乎都難以大力收水，到時港股回吐幾千點又炒過。
陸羽仁
回應(3) 我想回應
陸羽仁 BLOG 舊文