金融High Tea 2013年11月29日
走內線
2013年11月29日
期指昨日結算，走勢甚有「導演」味道，借住美股高開，大市喺中資股領漲下抽高，全日維持喺百幾點升幅，但到三點鐘後就走樣，結果出現單日轉向，倒跌收市，大戶殺淡倉的味道甚濃。
中資金融股係大市焦點，近日強勢的內銀股繼續領漲，下半年表現弱勢的內銀股，借住央行放水消息，都跟住炒上，中行(3988) 一度創出近期高位，但下午市況轉弱，內銀股就無運行，紛紛轉升為跌。
中資金融股玩換馬
內銀股面對市場改革挑戰，點都引起股民戒心，陸羽仁策略係高沽低買，拒絕長期持有，股民紛紛採取呢個策略，可能係內銀股集弱難改的原因，與此同時，有茶友就採取另一個策略，就係沽內銀換內險，係中資金融股間「走內線」。
茶友解釋，內銀股炒上落係一個短線搵食方法，如果唔想咁短線，都可以考慮趁內銀彈高套現，然後等機會換馬轉入內險股。由於內銀面對宏觀不利環境，好難長線大升，相反，由於內地明年有機會收水，息口係會抽高，對收息的保險股有利，故此兩類金融股一強一弱，呢個情況可能仲未完全反映晒，所以內銀股彈高，就有人走出來用內銀換內險。
內銀股普遍隨市偏軟。中行跌0.02元或0.54%，報3.72元；農行(1288) 跌0.02元或0.5%，報3.96元；最叻建行(939) 、工行(1398) 可以平收，內險則以近日表現硬淨的國壽(2628) 最穩，可以幸保不失。喺中資金融股推進下，開市港股升了128點，早段更曾大漲208點，創2011年以來新高。不過升勢隨即放緩，兩萬四關得而復失；大市於下午3時過後，沽盤突然急增，倒跌收市。恒指收報23789，跌17點，國企指數收報11385，跌16點，成交金額由昨日的690億元，縮減至633億元。
家族式經營的香港銀行搞唔到合併擴大規模，就只剩下出售一途。目前香港有四家家族銀行，包括創銀(1111) 、永亨(302) 、東亞(023) 及大新銀行(2356) 。
永亨皇帝女等嫁
馮鈺斌家族管理的永亨銀行，貸款及存款佔了本地市場2%，資本回報率約10%，一級資本充足率約10.8%，運作良好，最得潛在買家垂青。永亨幾個月前放風願意出售股權，9月時一度傳出新加坡大華銀行及澳新銀行有意競購永亨股權，令永亨9月17日由83.3元急抽39%至116.8元。洽購事宜及後不了了之，永亨股價回順，但在市場對永亨併購預期仍然高企，仍穩企於100元樓上。
昨日再傳有機構考慮收購永亨。據彭博報道，今次的潛在買家係中資機構中國安邦保險集團。據悉，安邦保險資產約5000億人仔，其中主要股東係上汽集團及中國石化集團。聞說中國農業銀行亦有興趣收購本地銀行，來港發展，睇嚟永亨不愁買家。
收購銀行消息傳出，永亨逆市抽高3.3%，收112.3元。其他中小型銀行即時炒一炒。此前被摩通降級的大新銀行炒高3%至14.04元。
陸羽仁
金融High Tea 舊文