金融High Tea 2013年11月15日
後悔無甩身
2013年11月15日
港股跌後反彈，表現可算預期之內。市場解釋係美聯儲局副主席耶倫在國會聽證會講稿暗示，美國不急於退市，加上市場已消化三中全會無驚喜的消息，港股經過連跌兩日後，於是回升。
出口股有睇頭
港股情緒家其實主要受內地主導，三中全會被外界演繹為對國企有衝擊，投資者對中資類股份仲係有好強觀望情緒。港股雖然出現反彈，惟動力明顯不足。表現比較好係一啲出口股，由於美國開始踏入消費旺季，對該類股份比較有利，幾隻出口股德昌電機(179) 、精電(710) 以至利豐(494) 、思捷(330) 表現都唔錯。思捷主席柯清輝增持曝光後，股價繼續攀升，收報16.8元，再升0.6元或3.7%，跑贏一眾藍籌股。
至於國策股方面，環保一如預期係中央扶持政策的穩膽，光伏股普遍受追捧，保利協鑫(3800) 連升四日，收報2.57元，再升3%；興業太陽能(750) 、卡姆丹克(712) 升2%。不過，順風光電(1165) 走軟，收報6元，挫6%。順風光電正進行併購，基本因素不斷變化，股價大上大落，已經唔只係跟隨板塊上落，而係變成一隻消息股。
各個板塊榮辱互見下，恒生指數收報22649，升185點；國企指數收報10391，升114點，成交金額由昨日的621.7億元縮減至542億元。
香港電視(1137) 未獲免費電視牌照，繼續與政府周旋。港視指行會不批出牌照與早於2011年7月通訊事務管理局的發牌建議有矛盾，但又畀唔出合理解釋。表示帚正尋求法律意見，考慮及準備提出司法覆核，睇嚟「發牌風波」仍未「殺青」。
政府發牌三揀二，獨獨唔發畀港視，主要理由係認為港視的財力不足以長期營運一個免費電視台。港視昨日公佈截至8月底的全年業績。由於未有免費電視牌照，仍未有廣告收入，期內營業額只有780萬元，虧損共4031萬元。港視今個年度投資了近2.9億元製作劇集、綜藝及資訊節目。
港視股東困愁城
港視現時手頭上仍持有現金及等值款項約21億元，較去年減少超過5億元。由於當中有19.6億元投資於可供出售債券，現金只有約1.6億元。公司決定在三至六個月內仍未攞到牌照，將放棄免費電視業務。唔夠現金，無法再頂落去啦。
股價方面，港視今年全年基本上變動唔大，長期維持在2.5元水平上下徘徊。比較大變化的是10月15日當天，市傳免費電視發牌已有決定，港視抽升28%至3.07元，但翌日知道牌照花落別家，股價一日內插水34%至2.03元，之後幾日又走番上2.6元。
投資者見政府就發牌決定企得好硬，港視攞到牌照的機會睇嚟都幾渺茫，股價連日內不斷尋底，公佈業績後，昨日逆市再跌超過3%至2.2元水平，由港視宣佈申請免費電視牌起，陸羽仁都係企係悲觀嗰邊，原因唔係一早預佢攞唔到牌，而係就算攞到牌，都唔係咁易做，大家見唔見香港電台起新大樓，竟然要起60幾億元，壹傳媒(282) 玩電視都燒咗二、三十億元，可見呢個係個「燒金窩」，議員話港視得廿幾億不如收皮，雖然好難聽，但從小股東角度，用呢筆錢去做電視，真係同買大細博一鋪差唔多，所以早前傳佢攞到牌股價飆上3元樓上無走貨，真係錯過咗黃金甩身機會嘞。
陸羽仁
金融High Tea 舊文