金融High Tea 2013年12月18日
板塊飄移
2013年12月18日
美股借住經濟數據有利炒上，港股高開下我行我路，慢慢轉升為跌，大市擺明係要跌唔會升，係聯儲局會議前繼續唞氣格局。
大市前後調整近千點，近日波幅開始徘徊，上落唔算太大，但中環茶友話唔好睇少咁樣上上落落，因為資金係不斷飄移換馬，暗暗為來年執位準備。呢次執位大格局係美國將會退市，環球經濟會開出新局，資金會由息口敏感股流向復甦股或增長股。最明顯係地產股繼續跑輸大市，恒生地產分類指數跌0.5%。
資金逃離息口敏感股
中港兩地地產股普遍唔掂，與資金逃離息口敏感股，大行唔睇好不無關係。
法巴亞太區股票投資主管鄺樂天日前表示，整體看好全球股票，預計明年歐洲會跑贏今年看好的日本，在政策支持下，認為現在是投資歐洲千載難逢的機會。中國方面則睇好電力、燃氣、科網、旅遊及內險等。
法巴的推薦不必盡信，但可以睇到就係落注不同板塊的執位行動已經展開。
大市昨日由升轉跌，原因之一係A股午後再下一城，在石油及地產股走弱拖累下，恒指午後終於頂唔住，恒指收市跌45點至23069點；國企指數挫38點至10894點，大市成交574億元。
油股腳軟，同陸羽仁早前講的周永康震盪暗有關連。中石油(857) 貪腐案餘波未了。
內地傳媒報道，中石油公司總會計師、昆侖能源(135) 董事長及執行董事溫青山，協助調查包括前中石油董事長蔣潔敏等多名高層的貪腐案。溫青山於昨日向董事會以個人原因提出辭呈，董事長職務暫由執行董事張博聞代辦，昆侖能源今日會復牌。受消息影響，中石油跌1.2%至8.55元，跌得最多嘅中海油(883) ，跌超過3.5%至14.18元，表面理由係被大行唱淡，實際係政治因素炒上落。上次昆能跌完急彈，睇吓今次會否再來一舖。
未來百元股考眼光
藍籌股年尾各展神通，強勢股和黃(013) 衝破百元大關，中環茶友開盤下一隻百元大股會是是那間，大熱是銀河娛樂(027) 。
濠賭股堪稱今年最強板塊，一線博彩股全部都變身大價股，表現最勇的銀河娛樂更是非常強勢，50、60元大關不斷衝破，昨日曾破70元大關。
臨近聖誕同年尾，係澳門旅遊高峰期，呢一浸升浪偷步炒的味道甚濃，究竟佢唔可以破一百元大關，第一個測試係聖誕後公佈出來的數據，假如對辦的話，唞一唞氣可能再上，等春節假期的表現。
澳門旅遊需求旺盛，目前最大挑戰係接待能力差不多去到飽和，由接載的士到酒店房間都有供不應求情況，其他地方做博彩要送房間同餐飲，澳門就連訂房都困難，一般遊客莫說免費房間，連平房都難求，因此成個澳門變成係一門暴利生意，接待能力愈強的公司，可見將來盈利上升潛力愈大，因此若起資金不斷追捧銀娛、金沙(1928) 、美高梅(2282) 、永利(1128) 同澳博(880) 幾隻博彩大股。
北控業務配合國策
茶友話，另一隻有機會上行接近百元的股份係北控(392) ，曾經被狂炒贏得「失控」之名的北控，近十年相當低調，但業務同股價就陰陰哋向上。
公司主要在北京經營管道天然氣相關服務；於北京及中國其他省份生產、分銷和銷售啤酒，另外興建污水及自來水處理廠及其他基礎設施。
公司業務同未來中國發展環保產業的國策相當配合，概念頗為吸引，現價25倍市盈率，息率只有1厘，只能講話好嘢無平啦。
陸羽仁
金融High Tea 舊文