金融High Tea 2014年2月25日
兩會冷水淋內房
2014年02月25日
港股昨日繼續下跌，雖然指數跌得唔算好多，但內房股就出現洗倉式急跌，幾隻龍頭大股都下插，市場傳聞個別銀行對房地產限貸，甚至暫停內房業務，搞到基金全線出貨，連內銀股都受影響腳仔軟晒。
港股唔靚仔，皆因淡風由內地吹落嚟，內地股市開市後暴跌，港股掉頭向下，失守牛熊線及十天線，臨近午市跌幅更曾擴大至306點。有報道指內地樓市逐漸降溫，常州杭州樓盤加入劈價戰，加上傳多間內銀暫停房貸業務，內房股全線捱沽。龍頭華潤置地(1109) 插近6%，是表現最曳藍籌股；中國海外(688) 都跌3.6%，其他內房股都跌6、7%。中環茶友話，新年之後好多內房股都傳出發債消息，大家都預先喺市場搵定錢先，畀到的息率普遍都比去年略高。比較之下，買內房債都有6、7厘票面回報，咁內房股自然要減吓價先抵買啦！
房價涉民生 政府要做嘢
市場早排仲炒緊兩會概念，認為會前會維穩，大家可以搵吓有乜股可以炒。內房突然咁樣急跌，有點一盤冷水照頭淋的感覺。對於呢個情況，陸羽仁會用升也兩會，跌也兩會嚟形容，好多人覺得兩會有國策炒，我就話要睇唔同板塊，有唔同效應。
?家香港着重民情，內地都一樣，尤其今屆政府，好着重民生，過去每逢兩會召開，房價過去都成為代表為民請命的議題。過去一年，內地樓市無明顯調整，一線大城市仲升咗價𠻹，喺咁環境下，你話班代表開會，會有乜意見呢？內地高官不是傻仔，所以兩會前傳出話房貸收水，應該係空穴來風，所以如果你「盲舂舂」走去炒兩會概念，乜股都走去買一餐，咁就好對唔住，畀人扑到應棍，所以我覺得今時唔同往日，兩會之前走去炒股，唔可以只識得一味睇好，仲要留意吓政治風向。
內房股被人狂插，從政治上講係有因有由。昨日見到情況係股價跌咗之後，散戶出嚟接貨，但基金無露面買嘢，反而仲係咁沽，睇嚟佢哋情緒都有點恐慌。假如手頭上仲有內房股未沽，咁就要睇吓係乜嘢貨色，係持有藍籌大股，早排無賣，?家變咗走避不及，如果唔係好等錢使，咁可能就要捱吓價先，因為佢哋咁急插落嚟，?家先至喺低位拋售，可能已經遲咗少少。
保利文化孖展稍降溫
喺內房內銀急插下，恒指收報22388，跌179點；國企指數收報9797，跌138，成交金額縮減至572億元。表面睇幅度唔算大，不過，市場氣氛唔係咁靚仔，加上內地股市又弱弱哋，散戶喺呢期都要小心啲。好似市場原預期首日招股的保利文化(3636) 反應火熱，不過，多間銀行「閂水喉」導致證券商資金減少，只能有限度提供孖展融資，加上孖展息率上調，首日孖展只超購76倍，遜於預期的至少100倍。
收市後，匯豐控股(005) 公佈，2013年僅多賺16%至156.31億美元，低於市場預期中值的178.6億美元，由於業績差過預期，倫敦股價即捱沽，曾低見6.17英鎊，折合港幣79.78元，之後稍為反彈，較倫敦上日收市價低3%，本港收市價則是83.9元，跌咗0.45元。
匯控去年繼續進行整固，包括出售平保(2318) 股份，另外透過不同方式開源節流，但暫時除了亞洲區業務，似乎仲未搵到乜嘢方法能夠重拾增長動力。
陸羽仁
金融High Tea 舊文