金融High Tea 2014年3月19日
炒國策 又中伏
2014年03月19日
龍源(916) 電力宣佈業績，純利倒退超過預期，股價應聲大跌超過一成。龍源係風能股龍頭，應該係穩定之選，點知業績差過市場估計，股價即刻碌低，相信都出乎市場人士意料之外。龍源重創，表現為國企指數最差；搞到同一板塊股份都腳軟，華能新能源(958) 跌超過8%，公佈全年業績的大唐新能源(1798) 挫5%，新天綠色(956) 瀉10%。
龍源累大行跌眼鏡
喺兩會期間，環保係主打概念，當時龍源股價卻炒極唔上，已經有啲唔對路，揭盅原來業績唔係咁靚仔，股價即時下滑，創咗今年新低，呢個故事話俾我哋聽，有時炒概念要眼明手快，有乜「依郁」就要走先，否則一下失足咁就坐艇。
派成績表前，有大行仲話推介龍源係風電股首選，好明顯上年佢盈利下滑，好多大行都跌眼鏡。美銀美林就解釋，佢業績遜預期，去年純利下滑21%，較估計差12.5%，係因為設備銷售營業收入未達標，同時面對折舊成本和維修成本增影響。該行力撐，撇開CDM收入及一次性項目，龍源經營溢利率由2012年的29.7%，增加至2013年的33.2%，加上利用小時率上升，維持「買入」評級，目標價由11.2元降至10.6元。由於佢股價已經急跌，相信好大程度反映咗負面消息，估計短期有機會已經見左低，但咁唔代表佢會好快升番。
睇嚟呢輪炒環保國策，光伏股好似易炒過風電股，好似隻興業太陽能又見一年新高嘞。光伏股勝在生意容易谷，同風電要慢慢搞先見成績好唔同，過往就不時聽到光伏股谷數谷出禍，雖然係咁，但對貪刺激的股民嚟講就仲啱feel，所以容易吸引炒家興趣。
公佈業績邁向高峰期，好多公司都發定盈利預告，好似月前私有化失敗的恒盛(845) ，就話明盈利會倒退，主要係由於綜合毛利率下降；投資物業的公允價值增加淨額下降；以及個別物業項目的尾盤存貨作出減值撥備。恒盛私有化失敗，股價即時回頭，現在又話盈警，坐艇小股東有可能再被人「糟質」。不過，中環茶友話，恒盛股價都唔係睇佢一年半載賺幾多錢，而係睇佢資產價值，上次小股東反對私有化，主要係因為覺得價錢太低，反映唔到公司真正價值，家大股東聽講好水緊，如果公司唔派息、唔賣產，不妨同大股東鬥吓耐性囉，最慘反而係本來入咗貨，想趁公司私有化套現的中資基金啫。
大市靠騰訊撐升
前晚美股大升，但人行收水步伐未停，今早再進行1000億元人民幣正回購，加上港匯續軟，反映資金流出，結果恒指收報21583，升咗109點，反彈力唔係咁強，國企指數收報9342，升9點，成交金額648億元。要留意係騰訊(700) 借住沽文化中國(1060) 大賺炒反彈，近日被拋售的支付股都止跌回勇。單一隻騰訊已貢獻大市109點升幅，跑贏一眾藍籌股，假如佢彈完收工，個市可能又會無力。
另外，英國《金融時報》報道，人民銀行與內地一間最大的國有銀行舉行緊急會談，討論是否救助一家將違約的房地產開發商。呢間內房商負債超過35億元人民幣，涉及建行(939) 、農行(1288) 等，其中建行奉化支行放貸額度最大，超過11億元。睇吓呢個消息又會唔會幫到近日積弱的內銀、內房股回一回氣。
陸羽仁
金融High Tea 舊文