金融High Tea 2014年3月7日
癲鳳鬥狂龍
2014年03月07日
科網股兩大龍頭繼續霸佔股場中央，騰訊(700) 升勢停不了，股價再創新高，大行睇目標價各自各精采，早排有大行用佢個冧巴700做目標價，日資行野村不甘寂寞，再發報告唱好，首予「買入」評級，目標價750元，消息令股價再創新高，中環茶友話，現在只係睇吓幾時，會有人話睇1000元！
騰訊一股做緊「幾嚿水」，一手雖然只係一百股，都要六萬幾元，中環茶友話，當佢升到2、300元，散戶已經開始離場，?家唔單止佢哋無貨，連大股東馬化騰都因為早早減持，手頭股份唔係咁多，變成淨係得番用opm(他人的錢)的基金經理會坐貨，喺貨源極度歸邊下，個價想去到邊就去到邊，喺佢氣勢如虹下，基金經理根本唔夠膽沽貨，以免跑輸大市，咁嘅情況有可能維持落去，直至爆煲為止。
騰訊歸邊任人舞
騰訊市值日日暴升，但論幅度，佢對手阿里巴巴的影子股中信21世紀(241) 就犀利得多，佢昨日狂升35%，如入無人之境，不過市值只係252億元，同騰訊或者阿里巴巴比，只係濕濕碎。阿里巴巴想話喺香港上市，但一直受股權結構困擾，最近傳出佢再考慮去美國，陸羽仁話中信21世紀係示範單位，俾股民睇吓阿里巴巴炒味幾濃，咁大家聽到佢捨港就美，自然就會肉緊好多，所以雖然佢每股資產淨值只得0.097元，而且乜嘢注資計劃都未有，股價都可以炒到上天。
現時兩大龍頭股，可以用癲鳳鬥狂龍嚟形容，落場炒作者，無論係玩正股定係窩輪，都係唔可以計數，只能你癲我更癲、你狂我仲狂嚟形容。呢個浪可以玩幾耐無人知，陸羽仁忠告係，若然夠膽參加呢類活動就無謂估頂，最實際係定個止蝕位去炒。至於定止蝕位仲有個竅門，就係唔好定得咁高，要定得低啲，因為定得高好容易震兩震就出咗局，跟住佢再升你又唔忿氣，咁寧願定得低啲，即係話預咗輸多啲先去玩，假如萬一觸及止蝕位，就真係狠心離場，好過止完蝕又買，買完又蝕，無晒分寸。
手機物流股變散戶恩物
由於兩大龍頭只有騰訊係藍籌，由佢力挺大市，已向恒指貢獻44點升幅，恒指收報22702，升123點；國企指數收報9672，升10點，成交金額增加至705億元。但藍籌佔大市成交續縮減，市場焦點仍在兩會概念股，如科網及環保相關股份。獲騰訊入股的華南城(1668) ，靠物流概念飆升7%，另一物流股伽瑪物流集團(8310) 喪升64%，收報0.63元，成為港股升幅最勁股份。仲有小米手機相關股都係散戶當炒恩物。
指數表面牛皮，個市實際炒味濃郁，兩會內容大家未必咁留意。除了領導人講話，要留意係港澳協調小組組長張德江透露，已指示港澳辦協調內地人來港安排，相信有關措施好快有眉目。
新股方面，藝術品拍賣股保利文化(3636) 首日掛牌，開市報42元，較招股價33元，高出27%；午後愈升愈有，收報42.6元，高過招股價三成，最高曾造44.6元，成交金額27億元。
陸羽仁
金融High Tea 舊文