魚樂無窮：直通車三大受惠股 - 唐牛
■建立上海與香港股票市場交易互聯互通機制，最受惠的當然是港交所。
總理李克強噚日喺博鰲亞洲論壇表示，會積極建立上海與香港股票市場交易互聯互通機制。三個字講曬︰直通車！港交所(388)為此急急停牌，其餘券商股隨即起哄爆升。不過今次好快就有公佈，仲係由兩地證監聯合公佈，內容就唔喺呢度多講啦，相信戰友都應該知道，反而有幾點大家要留意。
港交所200蚊指日可待
有別於七年前溫總版本的直通車，今次係兩地交易所互聯，按現時手上的資料，投資者係要通過交易所去做買賣，冇當年講到咁自由，可以直接到香港開戶炒股，咁其實最受惠的，當然就係港交所啦，復牌爆升在所難免，問題係大家敢唔敢追，2007年高位見過268.6元，停牌前收市價只有當日的一半，去年的蟹貨區是接近150元，相信復牌後未必會即時突破，換言之，如果升得穿就要追貨，200蚊大關應指日可待。
早前推介兩隻受惠股──中信証券(6030)及海通國際(665)，前者在內地有龐大業務，在香港亦有子公司，相信係兩地互聯的最大受益者，現已升抵短線目標價18元，戰友可先食一半套利，餘貨博衝上20元或更高；後者勝在有阿媽海通證券照住，一定比其他純本地證券股好，況且仍未到價，繼續坐定定。
最後要提一提戰友，2007年經常談及的「炒AH」差價，今次要揀得精明啲，因為不少大型H股股價，其實折合價已比A股股價高，當中包括各大金融類股份，所以昨日內銀全線回吐，亦屬正常。
唐牛
上一則: 炒友Blog：京能回勇上望4.5元 - 邱古奇
下一則: 股場放大鏡：國內資金吼金山軟件 - 歐陽風
魚樂無窮 - 唐牛 舊文