一周三件：威華達博爆升 - 錢雋
■威華達現時主力搞金融證券，業務開始清晰化，又食正直通車，前景亮麗。
威華達(622)等值淨現金挨近19億銀，係市值近1.5倍！集團呢期轉型搞證券業，食正阿爺微型直通車concept。去年底報載，大股東歐亞平，又係熱爆「三馬」旗下保險集團掌舵人。威華達靜咗咁耐，遲早整舖勁。
威華達到上年底，齋淨現金高達16.6億銀，連埋約2,236萬股港華燃氣(1083)，若果變現埋，淨現金加到近19億銀，或每股0.233元。即係話，以0.18元買入一股威華達，相當於揸住每股淨現金0.233元。威華達現價同淨現金折讓過20%，同NAV 0.54元，更加大折讓咗67%，殘到爆！
主攻證券食正直通車
威華達對上幾年，陸續將非核心業務剝離，家陣主力搞金融證券，業務開始清晰，又食正直通車。再講，呢瓣又同歐生出任三馬企業，有少少近磅。
又上年5月，威華達話，有意喺四川威遠縣頁岩氣產業園區投資。一年後剛啱呢個月頭，新華社報道，重慶全國第一個以頁岩氣作為原料嘅液化天然氣工廠，正式動工。
祖國頁岩氣開採到應用，已經好實在。而威華達計劃搞頁岩氣地方，正正就係中西部，加埋威遠縣頁岩氣蘊藏量高達3,000億立方米，亦好爆炸。
博威華達變身，頁岩氣係其中一個好近磅瓣數。上年6月，威華達話有意搞呢瓣業務，股價一個月升咗1倍到0.31元。威華達現價相對呢個位，折讓40%。買威華達，當上返每股淨現金0.233元計，要升30%，博頁岩氣舊事重提，上返0.31元，要升70%，到時，PB仲係得0.57倍。又威華達市值13億銀，最爆炸嘅憧憬，係憑住歐亞平，集團最終同三馬有link up，當殼股睇，閒閒哋，係一、兩個開計數。
錢雋
細價股專家
本欄逢周二、三、五刊出
上一則: 投資學堂：內銀派息守舊 - 譚紹興
下一則: 滙海探戈：滙市唔chok美元難動L - 奇兵
~TITLE_S~一周兩件 - 錢雋 2014年4月11日 舊文