魚樂無窮：炒細價股喪輸真人騷 - 唐牛
唐牛乃投資王擂台賽參賽者之一，由於遊戲只有冠軍可以贏獎金，加上參賽唔使成本，故一直採取一注獨贏細價或當炒股政策，務求盲拳打死老師傅。咁啱之前喪炒嘅中國鐵聯(745)，宣佈以20億銀收購電影及媒體相關業務，並喺上星期二復牌，眼見隻股由高位插水超過五成，心諗「彈番兩三成都好正常姐」，中伏之旅亦正式展開。
還記得當時喺0.85元衝入火場，之後兩日一度反彈至1元，但正如前總華探長呂樂話齋︰「一係唔貪，要貪就貪夠一億。」唐牛畀自己大條道理唔食糊，最後中正「有食唔食、罪大惡極」嘅詛咒。
中國鐵聯股價一路向南，噚日更低見0.145元，較高位大跌逾九成。唐牛個300萬倉，最新只係得番89萬銀，輸足七成，成績之差簡直史無前例，肉酸到呢……
永遠記住贏粒糖輸間廠
講咗咁耐，當然要馬後炮一番。炒細價股，永遠要有贏粒糖、輸間廠嘅準備。無他，當消息傳到老散如你同我都知，肯定係去到水尾，如果大家抱住贏間廠嘅心態，就算股價每日跌幾格，都會「希望在明天」mode，每日用幾格換一個希望，到最後只會換到一殼眼淚。
上述投資王擂台賽嘅經驗，相信唔少戰友都親身經歷過(唐牛何嘗不是)，最緊要交完學費後要學精，經常犯同一個錯誤，絕對唔抵可憐囉！
炒細價股唔想輸間廠可以點？兩個標準過DSE嘅答案︰1.嚴守止蝕；2.及早離去。
唐牛
上一則: Follow Me：錦江資產淨值料大升 - 高彰坡
下一則: 股場放大鏡：平保偏貴沽空有著數 - 歐陽風
魚樂無窮 - 唐牛 舊文