陸羽仁 BLOG 2014年4月16日
走了七成路?
2014/4/16 9:40:59
網誌分類: 經濟
美股昨日玩過山車，受住烏克蘭危局惡化、中美經濟數據不佳、日本可能加大量寛幾個因素左右衝擊，搞到頭都暈埋。
隨著親俄羅斯的激進分子攻佔越來越多的烏克蘭東部地區，烏克蘭臨時總統圖爾奇諾夫周日稱將採取軍事行動「反恐」，又強調不會允許俄羅斯吞併克里米亞的事件再次重演。有報導指「反恐行動」已在頓涅茨克(Donetsk)北部地區展開。與此同時，歐盟和美國表示將進一步加大對俄製裁力度。
烏克蘭緊張局勢升級，股民嚇到手震震，將資金調去債市避險。杜指昨日就抽100點，無耐受烏克蘭局勢影響下滑200點，但午又由跌轉升，由谷底慢慢上番100幾點，市傳日本政府預期經濟前景暗淡，可能會放水救經濟，日圓兌美元回軟，又利好借日圓買美股的利差交易，美股回升，收市神奇地收復所有失地，以升市收場。杜指升89點至16263點，標普500指數漲12點至1843點，收復1840點呢個重要支持位。納指高低波幅超過100點，一度失守4000點，收市企穩4000點上方，升11點，收4034點。
近日科技股都係開市無耐一升高啲就開始插，主要係投者都睇得比較短線，同時逢低吸納者少，獲利回吐者多，顯示近年好紅嘅科網股同生化股仍受「市值過份高估」影響。值得留意嘅係，股票嘅升與跌，有時與估值或者行業實質表現沒有直接關係，例如全年表現好強的航空股，行業基本因素唔錯，票價改善、競爭或者產能亦不斷減少，但近期整個板塊都在大幅下調，下調幅度且遠遠跑輸標普500指數，其中美國航空、Delta航空、United Continental與高位比較，都跌超過一成！
究其原因，原來航空股主要落在對沖基金手上，但近期由於科網股同生化股股價大幅下滑，由於對沖基金持股的桿杆比率都好高，一旦俾銀行追「孖展」，只好沽出穩定同獲利的股票套現應急，航空股就成為沽售對象啦。
好多人大感興趣是美股跌浪完未? 高盛的David Kostin認為呢個跌浪已捱過咗7成，但還有不少人認為標普500指數要跌10%，至少都跌5%，而家只係從高位跌咗3.5%，如今未跌夠，至少仲要跌多幾個星期。
我認為美股跌、港股跟跌係好事，若然可以回到22000點邊，就更係吸納良機。
陸羽仁
回應(4) 我想回應
陸羽仁 BLOG 舊文