中環在線：短途客較開胃最愛飛機餐咖喱同海鮮 - 李華華
■希戈位於尖沙嘴凱悅酒店，凱悅行政總廚唐利維(中)噚日即場獻技。曾顯華攝
提起飛機餐，唔少人即刻諗起雞、牛、魚，同埋好鬼難食！港龍航空負責餐廚嘅餐務部經理莊惠心(Kim)就話，短途線嘅飛機餐都算受歡迎，幾款主菜當中，最多人揀食海鮮，而咖喱等濃味食物亦都好搶手㗎。
坐過港龍嘅人都知，機上派嘅Haagen-Dazs雪糕係必食之選。Kim噚日透露，舊年總共派咗超過840萬份飛機餐，除咗甜品之外，熱葷中以海鮮最受歡迎。此外，由於人喺高空，味蕾嘅敏感度減低，咖喱、香辣等比較刺激性嘅菜式亦好多人like。
不過現時機場有好多食肆，唔少人都會選擇上機前，喺機場先食飽，上到飛機就大覺瞓。Kim就話，跟同系國泰航空(293)相比，港龍多數飛短途線，乘客嘅瞓覺時間唔多，用餐嘅比例反而較高。
佢舉例話，飛中國、台灣航線，唔少中國大媽跟團上機，對中餐非常捧場，仲會舉手要求「添飯」。相反，布吉航線嘅外國乘客比較多，佢哋準備飛機餐時會以西餐為主。
■飛機餐嘅咖喱等濃味食物好搶手。
港龍飛京滬供應Hugo"s菜式
港龍大部份航線飛內地，唔少商務客一個星期飛幾轉，次次食差唔多款式嘅飛機餐都可能惹來不滿，因此，港龍話要成日換餐牌保持新鮮感，避免乘客食厭，例如夏天有冬瓜盅，冬天食煲仔飯等等。
新近港龍就搵咗老牌西餐廳希戈(Hugo"s)合作，推出廿幾款如龍蝦湯、黑椒牛扒等招牌菜式，即日喺北京、上海航線供應，可惜只限於頭等同商務艙。
李華華
mailto:LiWaWa@AppleDaily.com
■港龍新飛機餐，前菜包括煙熏挪威三文魚、香煎多士及蟹肉沙律等。
上一則: 樂香園：國美奇怪回購事件 - 密西比
下一則: 中環在線：淘寶接力搞春拍吳冠中《龜》底價80萬 - 李華華
中環在線 - 李華華 舊文