金融High Tea 2014年4月16日
命運難逃
2014年04月16日
美國公佈的零售數據強勁，反映經濟基本因素唔錯，美國退市唔會拖，仲衰過內地經濟數據曳，3月貨幣供應增長降至2001年以來最低，加上人民銀行作出1720億元人民幣正回購收水操作，較上周四的1140億元人民幣大增，令中港股市齊齊插水。
內地數據差，最惹人關注係3月底廣義貨幣(M2)餘額增長只有12.1%，數字比預期低，資金流量低，亦反映經濟放慢，投資者擔心市場流動性不足，在今日中國公佈首季經濟增長前先沽貨鎖住利潤。
壞消息真係壞消息
數據差拖低股市之餘，有人話，乜唔係經濟愈差，市場對政府注資救市的憧憬會愈大，應該當係好消息咩？呢個講法唔係錯，但股市不能一本通書睇到老，特別依家有大戶興風作浪，識得順住個勢左右開弓。如果依家個市係21000點，陸羽仁可以話你知數據都唔係乜大事件；但當指數反彈去到23000點，短線升幅唔少，大戶做法又會唔同喇，須知去到23000左近，散戶淡倉都殺得七七八八，以短線計，大戶仲一條氣大力砌上去又為乜呢？係呢個情況下，壞消息就真係壞消息，搞到個市跌落嚟囉！
係內地數據拖累下，恒指昨收報22671點，挫367點；國企指數收報10028，挫215點，成交金額636億元。炒互聯互通的消息停一停，港交所(388) 收報141.9元，跌7.9元；炒A、H折讓概念的股份也急跌。
昨日下跌股份中，可以一提係比亞迪(1211) ，其首3月汽車銷量跌28%，僅得10.35萬輛，股價昨午後跌幅擴大，收報46.85元，大跌3.5元。
比亞迪股價借出貨量低調整，但呢個問題唔係今日先發現。係年初比亞迪開始推出「秦」系列房車，內地分析已經話今次係佢面臨真正考驗的時間，因為過去比亞迪賣車，好多都係公共車輛。這些公共車輛好多時有政府補貼，作為推動環保的政策，但車市真正的主要市場，仲係私人買家，「秦」系列的房車就係強攻呢個市場。
私家車買家唔會考慮政策，主要係從消費角度去諗買唔買，係依家電動以至混能車配套仲係同傳統汽車有距離下，比亞迪賣車唔係咁快，又點算意料之外呢？
去年比亞迪股價開跑，時間同華爾街環保車股Tesla炒上差唔多。Tesla主要投資者係史丹福大學碩士輟學生伊隆馬斯克。佢來自矽谷，同時係個包裝天才，在創辦科技公司賺第一桶金後，投資大搞火箭公司同環保車公司，呢位包裝之星帶住佢嘅科技團隊，搵到政府俾生意佢家火箭公司，同時又搵到大班投資者追隨Tesla，將股價捧到咁高。
比亞迪變中國版Tesla
Tesla成功之處，係研發的電動車定位為跑車，不但賣環保，而且係賣速度同型仔，完全投合美國人愛奢侈但又要話自己愛地球的性格，令佢嘅車供不應求。
究竟Tesla講速度係咪咁勁，又或者佢賣實賺嘅錢係咪咁多呢？呢樣係華爾街唔係最重要，最重要係概念受落，令佢去年可以同其他科技股一齊，加入神仙股俱樂部。
係Tesla大炒之下，比亞迪同科網股一樣，成為基金落注中國市場的影子股，於是股價升完又升。不過，由3月份起美國科技股開始見頂，Tesla股價都由265美元回落，今個星期終於跌穿200美元，調整幅度約為25%。有美國之鑑，比亞迪作為中國版Tesla，調整命運似乎難免。如果用佢高位55元相比，調整幅度大約18%，暫時仲唔係咁低咋。
陸羽仁
金融High Tea 舊文