異動空間：一起中伏的日子 - 魏力
二三線狂洗倉，要錢唔要貨，沽壓大之餘，敢接貨的人更少，形成惡性向下。科網、濠賭、彩票、支付、風電股高位墜崖，傷到入骨；內房大幅劈價散貨，似是資金鏈出現問題，唔使睇。信貸違約問題困擾，內銀、內險股長住ICU。強國PMI續萎縮，加上產能過剩，資源、航運股已成長期病患者。傷兵滿營，日日都殘陣應戰，弱勢料難逆轉。如今熄報價機係最好嘅止痕方法，否則望住隻股升咗幾格，以為可衝入場搵食，點知原來係虛火，一買就中伏，只會蠶食資本及信心。呢個市搵唔到錢，放棄吧，信我！在這個一起中伏的日子，想撈貨要等，想保本要忍！
有戰友問如何部署撈底？這先要決定三樣嘢：撈邊幾隻？每隻買幾多？分幾多注撈？一般而言績優強勢股最後跌、最先彈，要撈呢類股要身手敏捷，金山軟件(3888)、信義光能(968)可考慮。撈貨通常只揀最有把握的三至五隻，否則亂撈一堆股票，好易嘔凸。以一隻買10萬蚊為例，第一注先試2萬蚊，跌的話不加注，升的話疊上去，以免越撈越見鬼，撈底變淆底，偷雞唔到蝕把米。異動股可留意電盈(008)，大成交破位，滙證睇4.72元，可吼。
魏力
http://www.facebook.com/2012jason
上一則: 何車500：大昌行趁低上車 - 何車
下一則: 青心直說：嶄新投資概念 - 胡孟青
異動空間 - 魏力 舊文