金手指：屈政府大茶飯 - 孫柏文
■筆者特別點出粉嶺雍盛苑的法團，曾發生起義事件，其後有法團業主往開會前被斬傷。圖為雍盛苑的雍薈閣。資料圖片
屈到政府機，永遠都係印銀紙咁好賺，特別係如果有大量儲備。前雷曼嘅黃元山就話攞來「拯救」啲輸清光嘅銀行家最好。不過，你冇咁叻喺雷曼做過，點攞呢？
儲備，唔係淨係特區政府有，其實做過家住幢樓嘅法團委員，都知好多幢大廈、屋苑等都囤咗以萬元計甚至上億元嘅儲備，為緊急維修用。
自組法團財源廣進
不過，呢啲私人法團當然難屈啦，因為做得業主嘅就唔係廢青，係社會棟樑，所以一定睇實盤數，亦同政府冇關。咁點先可以屈到政府機？周末時聽個8,000蚊粒鐘嘅律師講故仔。香港有三個屋苑，以居屋同公屋混合組成，公屋業主係邊個？咪政府囉。咁呢啲混合屋苑嘅法團，有居屋業主同政府嘅代表，業主使錢第一考慮就當然係值唔值，而政府代表就係有冇按本子辦事。
根據《蘋果》報道，三個混合屋苑其中喺粉嶺嘅雍盛苑，喺大約十年前試過有少數業主起義，揸好多proxy換曬啲法團委員後，儲備大幅減少，批工程時數量增加，但係額度減細，實質令啲工程避過委員以外業主們嘅批核。雍盛苑最大單一業主嘅政府點？當然有單照負啦，因為佢哋係曾擁有領匯(823)物業都能蝕錢，使other people"s money嘅房屋署嗎！只要有人識跟規例屈機，佢哋就會畀錢。
當然，雍盛苑仲有啲醒覺嘅居屋業主，見情況不妙想用nuclear option去解散立案法團止蝕。點知喺開法團會嗰日，呢位叫吳潤祥嘅業主，行緊去會場時被兇徒斬，開唔到會。之後有冇破案？唔知，我冇問。
咁嘅肥肉點嗒呢？第一步，先買嗰度嘅樓成業主，跟住換曬啲法團委員，自己話事時拆細啲工程，跟住納稅人嘅錢財就會廣進。咁邊到仲有啲咁嘅筍盤？咪就係大角嘴嘅海富苑同調景嶺嘅彩明苑囉！食到大茶飯，想窮都難呀！
孫柏文
獨立股評人
http://facebook.com/shuen
本欄逢周二刊出
上一則: 青心直說：嶄新投資概念 - 胡孟青
下一則: 一周三件：橙天嘉禾夠平 - 錢雋
金手指 - 孫柏文 舊文