魚樂無窮：吼實兩大蓄勢反撲股 - 唐牛
昨日傳統強勢股再次抬頭，3月份澳門的博彩收入按年增長13.1%，雖然表現唔算標青，但已經惹來資金瘋狂掃貨，銀娛(027)、金沙(1928)、永利(1128)等濠賭股全部報復性上升。
科網股亦同時起動，騰訊(700)炒高4%，氣勢迫人。究竟今次係挾倉，定係重拾升勢，其實仲係好難估，入市只能摸著石頭過河。
投資者搭順風車可揀早前強勢、但仍未反彈至高位嘅股份，博仲有追落後空間。今日推介濠賭及科網相關股份各一，希望食盡個勢。
目標一︰澳門餐飲股佳景(703)。賣點︰主席陳澤武罕有連環增持，上星期三及四共掃入近百萬股，平均價介乎3.969至3.987元，雖然只係幾百萬錢，但有象徵意義，事關佢對上一次增持，已經講緊係2012年嘅事，當年入市後，佳景升浪一直冇停過，指標作用極大。
通達重上批股價
同一時間，金手指惠理再喺場內掃貨，最新持股量增至6.16%，兩大股東齊齊撈貨，加上現價較高位低近三成，憧憬空間大，佳景諗得過。
目標二︰手機設備股通達(698)。賣點︰經過早前一輪洗倉潮之後，通達終於可以重上批股價1.12元，10日線收復可期。而同屬小米概念股嘅金山軟件(3888)，噚日已創出收市新高，通達較高位平兩成，水位十足！
唐牛
上一則: Follow Me：東嶽折讓大睇升21% - 高彰坡
下一則: 股場放大鏡：鳳凰醫療趁調整買貨 - 歐陽風
魚樂無窮 - 唐牛 舊文